Pavlodar oblysynda 6 jasar balanyń ústine fýtbol qaqpasy qulap ketti

PAVLODAR. KAZINFORM — Fýtbol alańynda jaraqat alǵan balany jabyq bas-mı jaraqatymen Pavlodar oblystyq balalar aýrýhanasyna jatqyzdy, dep habarlaıdy Kazinform agenttiginiń tilshisi.

Oblystyq jedel medıtsınalyq járdem stantsııasynyń málimetinshe, shaqyrý 31 shilde kúni saǵat 15:08-de túsken. Jetekshilerdiń aıtýynsha, Pavlodar aýdanyna qarasty Jertumsyq aýylynda balaǵa fýtbol qaqpasy qulap ketken.

— Bala jabyq bas-mı jaraqatyn jáne mı shaıqalý dıagnozymen oblystyq balalar aýrýhanasyna jetkizildi, — dep habarlady medıtsınalyq uıymnyń baspasóz qyzmeti.

Aýrýhana málimetine súıensek, 2019 jyly týǵan bala jaraqat bólimine jatqyzylǵan. Qazirgi ýaqytta jaǵdaıy qanaǵattanarlyq, qajetti emdeý jáne dıagnostıkalyq sharalar júrgizilip jatyr.

Osy ýaqytta Pavlodar oblystyq polıtsııa departamenti alań men qaqpanyń eshbir resmı balansta tirkelmegenin málimdedi. Olar aýyl turǵyndarynyń ózderi ornatqan qurylǵylar eken.

— Aýdan ákiminiń atyna balalardyń oıyn qaýipsizdigine saı standarttarǵa sáıkes fýtbol alańyn uıymdastyrý jáne osy jaǵdaıǵa jol bergen sebepterdi joıý boıynsha nusqama joldandy. Sonymen qatar, kámeletke tolmaǵan balanyń qaýipsizdigin qamtamasyz etý jónindegi mindetterin tıisti deńgeıde oryndamaǵany úshin balanyń zańdy ókilderi ákimshilik jaýapkershilikke tartyldy, — dep habarlady Pavlodar oblysynyń PD baspasóz qyzmeti.

Eske sala keteıik, buǵan deıin Pavlodarda bir áıel eki balany terezeden laqtyryp, keıin ózi besinshi qabattan sekirip ketkeni habarlanǵan bolatyn. Bul derekke baılanysty qylmystyq is qozǵalǵan. Keıin bir jarym jastaǵy balaǵa búıregin alyp tastaý úshin ota jasalǵan.