Pavlodar oblysynda 59 myńnan astam adam jer kezeginde tur

PAVLODAR. KAZINFORM — Óńirde jeke turǵyn úı qurylysyn salý úshin jer kezeginde turǵan halyqtyń basym bóligi Pavlodar men Ekibastuz qalalarynda ornalasqan. 

Oblysta jeke turǵyn úı qurylysyn salý úshin jer kezeginde turǵandardyń biryńǵaı elektrondyq tiziliminde 59 085 ótinish tirkelgen. Olardyń ishinde Pavlodar qalasy boıynsha — 37 654, Ekibastuz qalasynda — 11 373, Aqsýda — 4 803, Baıanaýyl aýdanynda — 4 032, Pavlodar aýdanynda — 1 223 adam bar.

— 2023-2024 jyldary jáne jyl basynan oblys aýmaǵynda barlyǵy 604 jer ýchaskesi azamattarǵa bólingen. Onyń ishinde bıyl oblys ortalyǵynda bireý ǵana berilse, eń kóbi Ekibastuz (32) ben Aqsýda (27) tirkelgen. Aýdandar arasynda eń kóbi (16 jer telimi) Pavlodar aýdanynda berilgeni anyqtaldy. Jer kodeksiniń 50-babynyń normalaryna súıensek, elimizdiń árbir azamaty 10 akr jer ýchaskesin tegin alýǵa quqyly. Biraq atalǵan kodekstiń 44-babynda jeke turǵyn úı qurylysyn salýǵa qarastyrylatyn jer ýchaskeleri tek sýmen jáne elektr jelilerimen qamtamasyz etilgen alańdarda ǵana beriletini kórsetilgen Jeke turǵyn úı qurylysyn salý úshin jer telimderine ınfraqurylym tartý jobalary qazirgi kezde joq, — deıdi Pavlodar oblysy ákiminiń orynbasary Dáýren Jambaıbek.

Jer kezegine turý úshin turǵyndar ótinishti EGOV nemese mobıldi qosymshaǵa tirkelý arqyly bere alady. Ol jerde «jyljymaıtyn múlik — jer qatynastary» bólimin tańdap, «JTQ úshin jer ýchaskesin qaraý nemese kezekke qoıý» memlekettik qyzmetin basý kerek. Ári qaraı kezekke qoıý pármenin tańdap, ózińizge qajet eldi mekendi tańdaý shart. Sońynda ETsQ nemese bir rettik parol arqyly memlekettik qyzmetke qol qoıylady.

Buǵan deıin Qyzylordalyqtardyń jer kezegi 20 jyldan beri jyljymaı kelgeni týraly jazǵanbyz.