Pavlodar oblysynda 51 myńnan astam adam volonterlik qozǵalysqa múshe
PAVLODAR. KAZINFORM — Óńirde 86 volonterlik uıym men 400-den astam bastamashyl top jumys isteıdi. Tek ótken jyldyń ózinde olardyń kúshimen 2 myńǵa jýyq túrli is-shara ótkizilgen.
Ertis-Baıan óńirindegi eriktilerdiń sany ósip keledi. Búginde aımaq boıynsha 51 myńnan astam eriktiler esebinde tur. Aqparat jáne qoǵamdyq damý basqarmasynyń bólim basshysy Jannur Ahmetjanova atap ótkendeı, búginde óńirde resmı tirkelgen 86 volonterlik uıym men 400-den astam bastamashyl top bar. Tek ótken jyldyń ózinde olardyń kúshimen 2 myńǵa jýyq túrli is-shara uıymdastyrylǵan.
— Eriktilerge memlekettik qoldaý oblystyq volonterler front-ofısi arqyly kórsetiledi. Munda jumys jeti baǵyt boıynsha júrgiziledi: tótenshe jaǵdaılar volonterligi, ekovolonterlik, is-sharalyq-mádenı volonterlik, sport jáne densaýlyq, medıa, bilim berý volonterligi jáne zoovolonterlik, — dep atap ótti basqarma ókili.
Buǵan deıin Memleket basshysy Qazaqstanda ekovolonterler qozǵalysy keń qanat jaıyp kele jatqanyn atap ótken edi.
