Pavlodar oblysynda 30 tamyzdan kúzgi ańshylyq ashylady

PAVLODAR. KAZINFORM - Ertis boıyndaǵy 31 ańshylyq sharýashylyqta qustyń bes, ańnyń tórt túrin aýlaýǵa ruqsat berilip otyr.

QR Ań aýlaý qaǵıdalarymen bekitilgen merzimderge sáıkes, 30 tamyzdan bastap Pavlodar oblysy aýmaǵynda jabaıy janýarlarǵa kúzgi ańshylyq maýsymy ashylady.

Atap aıtqanda:

• - qaz, úırek, qasqaldaqqa – 2025 jylǵy 30 tamyzdan 30 qarashaǵa deıin;
• - shilge – 2025 jylǵy 6 qyrkúıekten 30 qarashaǵa deıin;
• - qurǵa – 2025 jylǵy 6 qyrkúıekten 15 jeltoqsanǵa deıin (ańshylyq tuqymdy ıttermen jáne qyran qustarmen ań aýlaý 15 tamyzdan bastap) ruqsat etiledi.

Sondaı-aq ańshylar 1 qyrkúıekten 15 qarashaǵa deıin borsyqqa, inge kirgenge deıin sýyrlarǵa, 6 qyrkúıekten 31 jeltoqsanǵa deıin qabanǵa myltyq kezeı alady. Al sibir elikteriniń atalyqtaryn aýlaýǵa qazirdiń ózinde ruqsat bar. Tek urǵashylary men tólderin 15 qyrkúıek - 31 jeltoqsan aralyǵynda aýlaı alasyz.

Óńirlik orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, aımaq boıynsha 36 ańshylyq sharýashylyqtyń tek 31-inde kúzgi-qysqy ańshylyq maýsymy ashylady. Jabyq sharýashylyqtar - Aqtoǵaı aýdanyndaǵy «Ertis», «Jambyl», Baıanaýyldaǵy «Maıqaıyń», Aqqýly aýdanyndaǵy «Aqqý», Sharbaqtydaǵy «Sharbaqty».

Buǵan deıin Májilis depýtattary ań atý baǵasyn kóterý qajet ekenin málimdegen.