Pavlodar oblysynda 3 myńnan astam adam bankrot dep tanyldy

Pavlodar oblysy boıynsha memlekettik kirister departamentiniń málimetinshe, taǵy 980 ótinish boıynsha bankrottyq rásimi jalǵasyp jatyr. Al 13 myńnan astam ótinish berýshi sol kezdegi talaptarǵa sáıkes kelmegendikten, rásimnen bas tartylǵan.

Memlekettik kirister organdary sottan tys bankrottyq rásimine qoıylatyn talaptardyń jeńildetilgenin atap ótti. Endi bank nemese mıkroqarjy uıymy lıtsenzııasynan aıyrylǵan, taratylǵan ne tıisti tizilimderden shyǵarylǵan jaǵdaıda da bereshekti esepten shyǵarýǵa múmkindik bar.

Memlekettik kirister departamenti túsindirý jumystary jáne baılanys ortalyǵy basqarmasynyń basshysy Tólegen Shaımardanovtyń aıtýynsha, ótinish berý kezinde qaryzdyń naqty somasy men kredıtordyń ataýyn kórsetý, sondaı-aq rastaıtyn anyqtamalardy qosa berý talaby alynyp tastaldy.

— Sonymen qatar, mólsheri bir AEK-ten tómen tólem tólem merzimin ótkizý kezeńin úzbeıdi. Kredıt boıynsha tólemdi 12 aıdan astam ýaqyt ótemegen azamattarǵa da ózgerister engizildi. Zańda kózdelgen jaǵdaılarda endi olar bankpen bereshekti aldyn ala retteýge mindetti emes. Bıylǵy 19 naýryzdan bastap qaryzy 1 600 AEK-ke deıin jáne tólem merzimi bes jyldan astam ýaqytqa keshiktirilgen azamattar úshin sottan tys bankrottyq rásiminiń merzimi alty aıdan bir aıǵa deıin qysqartyldy, — dep atap ótti departament ókili.

Mamandar bankrottyqtyń qaryzdy esepten shyǵarýmen qatar, belgili bir shekteýlerge ákeletinin eskertedi. Bes jyl ishinde azamat qaryz ala almaıdy jáne kepilger bola almaıdy. Úsh jyl boıy onyń múliktik jaǵdaıyna monıtorıng júrgiziledi. Bankrottyq rásimin qaıtadan jeti jyldan keıin ǵana paıdalanýǵa bolady.

Osyǵan baılanysty mamandar azamattarǵa bankrottyq týraly ótinish bermes buryn qaryzdy esepten shyǵarý múmkindigimen qatar, bankrot mártebesiniń saldaryn da muqııat baǵalaýǵa keńes beredi.

Eske sala keteıik, buǵan deıin Konstıtýtsııalyq Sot bankrottyq rásimine qol jetkizý sharttarynda kemsitýshilik belgileri bolmaǵanyn habarlaǵan.