Pavlodar oblysynda 219 mln tonna óndiristik qaldyq jınalyp qalǵan
PAVLODAR. KAZINFORM - Qaldyqtardyń basym bóligi tústi jáne qara metallýrgııa, jylý energetıkasy, paıdaly qazbalardy óndirý ónerkásibi, munaı óńdeý salasyna tıesili.
Óńirdegi tabıǵat paıdalanýshylardyń málimetinshe, 2024 jyly Pavlodar oblysy boıynsha ónerkásip salalaryna baılanysty jınalǵan óndiristik qaldyqtardyń kólemi 219 mln 89,2 myń tonnany quraǵan.
— Bul qaldyqtar tústi jáne qara metallýrgııa, jylý energetıkasy, paıdaly qazbalardy óndirý ónerkásibi, munaı óńdeý salalarynda qordalanyp qalǵan. Jer qoınaýyn paıdalanýshy kásiporyndar ekologııalyq Kodekstiń 87 jáne 90-baptaryna sáıkes qorshaǵan ortaǵa áser etýge ruqsattar alǵan. ıAǵnı jer qoınaýyn paıdalanýǵa arnalǵan kelisimsharttar jáne memlekettik ekologııalyq saraptamamen kelisilgen ken oryndaryn ıgerý jobalary bar. Sondaı-aq, taý-ken úıindileri, taý-ken jumystaryn damytý josparlary jáne basqa normatıvtik qujattar bar. Jumystar kelisilgen josparlarǵa sáıkes júrgizilýde, — deıdi Ekologııa jáne tabıǵı resýrstar mınıstrligi ónerkásiptik qaldyqtar basqarmasynyń sarapshysy Arman Ǵalymjanov.
Ótken jyly oblys kásiporyndary tabıǵat qorǵaý is-sharalaryn iske asyrý maqsatynda 46,9 mlrd teńge ıgergen. Josparlanǵany 29,1 mlrd teńge bolsa, naqty túrde bul kórsetkish 157%-ǵa oryndalǵan.
QR Salyq jáne bıýdjetke tólenetin basqa da mindetti tólemder týraly kodeksine sáıkes, kásiporyndar qorshaǵan ortaǵa teris áser etkeni úshin tólemaqy alynady.
Onyń bekitilgen tarıfteri bar. Nysan operatorlary jyl saıyn qorshaǵan ortaǵa teris áser etkeni úshin tólem júrgizedi.
Ekologııa jáne tabıǵı resýrstar mınıstrligi keltirgen derekterge súıensek, taý-ken ónerkásibinde «Bogatyr Kómir» JShS, «Maıkúben-Vest» JShS, «KAZ Minerals Bozshakol» JShS, «Angrensor» AQ, «Eýroazıattyq elektr stantsııasy» AQ qaldyqtardyń denin shyǵaryp otyr.
Al jylý energetıkasynda Ekibastuzdaǵy qos GRES, «Qazaqstan alıýmınııi» AQ-nyń ejylý-elektr stansasy, «Pavlodarenergo» AQ-ǵa qarasty eki JEO qaldyqtardyń negizgi bóligin túzedi. Tústi metallýrgııa boıynsha qomaqty kólem «Qazaqstan alıýmınııi» AQ-ǵa tıesili.
— Qorshaǵan ortaǵa teris áserdi azaıtý maqsatynda 2025 jyldan bastap 1-sanattaǵy obektiler úshin eń ozyq qoljetimdi tehnologııalardy (EQT) engizý qarastyrylǵan. Qazirgi ýaqytta mınıstrlik 12 EQT anyqtamalyǵyn ázirledi. Bıyldan bastap 1-sanattaǵy obektiler úshin keshendi ekologııalyq ruqsattyń bolýy mindetti. Ekologııalyq ruqsattar bolmaǵan jaǵdaıda tólem mólsherlemesiniń koeffıtsıentteri 2, 4 jáne 6 ese ósedi (Salyq kodeksiniń 43-9-babyna sáıkes). Qaldyqtardy basqarý salasyndaǵy memlekettik ekologııalyq saıasattyń qaǵıdattary ıerarhııa qaǵıdatyna negizdeledi. ıAǵnı qaldyqtardyń qaıta bolýyn boldyrmaý, olardy qaıta paıdalanýǵa daıyndaý, óńdeý, kádege jaratý, joıý is-sharalary, — deıdi Arman Ǵalymjanov.
Investıtsııalyq jobalardy iske asyrý máselesi jergilikti atqarýshy organdardyń quzyretine jatady.
Sonymen qatar, jobalyq sheshimder ekologııalyq jobalardy qaraý jáne memlekettik ekologııalyq saraptama qorytyndysyn berý kezinde ekologııalyq talaptardyń saqtalýyn qamtamasyz etý maqsatynda Pavlodar oblysynyń ekologııa departamentimen qarastyrylady.