Pavlodar oblysynda 20-ǵa jýyq aýyl mektebi Starlink-ke qosyla alady

Ilon Mask kompanııasynyń Starlink spýtnıktik ınternetine Pavlodar oblysyndaǵy jıyrmaǵa jýyq mektepti qosý josparlanyp otyr. Bul – qazir ınterneti joq jáne ony qosýǵa tehnıkalyq múmkindik joq aýyl mektepteri, dep habarlaıdy Kazinform agenttiginiń menshikti tilshisi. 

Qosylý quny aıyna 200 dollar nemese 94 myń teńge (búgingi kýrs boıynsha). Bul – bir abonenttiń baǵasy.

«Bizde ınterneti múldem joq mektepter bar, sany – 21. Olardy joǵary jyldamdyqty Starlink ınternetimen qamtamasyz etkimiz keledi. Sebebi basqa jolmen ınternetke qosý múmkin bolmaı tur: ol jerge eshkim optıka salmaıdy – óte qymbat, radıoreleli stantsııalarmen másele sheshilmeıdi, ázirge ol tehnıkalyq turǵydan múmkin emes. Ásirese taýly aımaqqa jatatyn Baıanaýyl aýdanyna qosý josparlanǵan, óıtkeni taý bederi kúrdeli bolǵandyqtan sapaly sıgnal ótýi qıyn. Starlink-ke qosylý baǵasy bir abonentten 200 dollar. Jyldamdyǵy óte joǵary – 150-200 Mbps. 200 dollar degenimiz – biryńǵaı tarıf. Máselen, 20 dollarǵa 10 Mbps satyp alý múmkin emes. Sonymen qatar Ilon Mask spýtnıkter tobyna qosylatyn termınal satyp alý qajet», - dedi Pavlodar oblystyq Tsıfrlyq tehnologııalar basqarmasynyń jetekshisi Elnur Ótebaev.

Vedomstvo basshysynyń sózinshe, qazir Pavlodar oblysynda 352 aýyldyń 11-i ınternetke – jelilik pen mobıldikke de qol jetkize almaı otyr. Munda 1,1 myń adam turady. Sondaı-aq ınterneti bar, biraq sapasy men jyldamdyǵy ortashadan tómen, úıdegi ınternetke qosylýda qıyndyq týatyn birqatar aýyl bar.

Jalpy 22 aýyl problemalyq sanatqa jatady.