Pavlodar oblysynda 20 aýyl ishimdikten bas tartty

PAVLODAR. KAZINFORM — Ekibastuz qalasyna qarasty 15 aýylda, Aqsý qalasy men Baıanaýyl aýdanynyń tórt aýylynda, sondaı-aq Tereńkól aýdanyndaǵy bir aýylda alkogol ónimderin satýǵa tyıym salynǵan. Nátıjesinde atalǵan eldi mekenderge birde-bir qylmys tirkelmegen.

Óńirde alkogol ónimderin satýdan óz erkimen bas tartqan eldi mekenderdiń sany artyp keledi. Qazirgi tańda óńirde 20 aýyl ishimdikten tolyqtaı bas tartyp, dúkenderde alkogol ónimderiniń barlyq túrin satýdy toqtatty.

— Máselen, Ekibastuz qalasyna qarasty 15 aýylda, Aqsý qalasy men Baıanaýyl aýdanynda — árqaısysynda eki aýyldan, sondaı-aq Tereńkól aýdanynda bir aýylda alkogol ónimderin satýǵa tyıym salynǵan. Atalǵan eldi mekenderdegi barlyq dúkende alkogol ónimderi satylmaıdy. Bul eldi mekender jasalǵan memorandýmdarǵa sáıkes alkogol ónimderin tutynýdan túbegeıli bas tartty. Mundaı sheshimder aýyl aqsaqaldary men qoǵam ókilderi qatysatyn keńesterde qabyldanady, — dep habarlady óńirlik polıtsııa departamentinen.

Turǵyndardyń alkogolden bas tartýy qylmystyń azaıýyna, quqyq buzýshylyqtar men otbasylyq janjaldardyń aldyn alýǵa yqpal etedi. Sońǵy jyldary atalǵan aýyldarda birde-bir qylmys tirkelmegen.

Turǵyndar alkogolden bas tartýdyń arqasynda ózderin qaýipsiz ári jaıly sezinetinderin, eldi mekenderde tártip pen tynyshtyq ornaǵanyn atap kórsetken.
Polıtsııa qyzmetkerleri aldaǵy ýaqytta mundaı aýyldardyń sany arta túsedi dep úmittenedi.

Eske sala keteıik, elimizde saǵat 20:00–den keıin alkogol satylmaýy múmkin ekeni aıtyldy.