Pavlodar oblysynda 2 myńǵa jýyq gektar jerdi paıdalaný talaptary buzyldy

PAVLODAR. KAZINFORM – Pavlodar oblysynda aýyl sharýashylyǵy jerlerin paıdalaný talaptarynyń buzylǵany anyqtaldy, dep habarlaıdy Aýyl sharýashylyǵy mınıstrligi.

QR Aýyl sharýashylyǵy mınıstrligi Jer resýrstaryn basqarý komıtetiniń Pavlodar oblysy boıynsha departamenti Kóktóbek aýyldyq okrýgindegi aýyl sharýashylyǵy taýar óndirýshisine qatysty kóshpeli tekseris júrgizdi.

Tekserý barysynda jalpy kólemi 1991,5 gektar bolatyn jer ýchaskesinde jer paıdalaný normalary saqtalmaǵany belgili boldy. Kópjyldyq shópter (espartset) egilgenine qaramastan, sýarý júıesi ornatylmaǵan. Sonymen qatar ýchaskeniń aınalasy qazylyp, jartylaı úıindiler jasalǵan. Budan bólek, topyraqtyń qunarly qabatynyń joıylý faktileri tirkelip, jerdiń búlingeni anyqtaldy.

- Bul jaǵdaı QR Jer kodeksiniń 65 jáne 140-baptarynyń talaptaryna qaıshy keledi. Tekserý qorytyndysy boıynsha jer paıdalanýshyǵa nusqama berilip, ákimshilik aıyppul salyndy. Jer ıesi bul sheshimmen kelispeı sotqa júgingenimen, Pavlodar oblysynyń mamandandyrylǵan aýdanaralyq ákimshilik soty departamenttiń sheshimin kúshinde qaldyrdy. Keıin QR Joǵarǵy Soty da ony zańdy ári negizdi dep tanydy, - delingen aqparatta.

Aýyl sharýashylyǵy mınıstrliginiń dereginshe, jer talaptaryn buzýshy tarapynan topyraqtyń qunarly qabaty qaıtadan qalpyna keltirildi.

Mınıstrlik Jer kodeksiniń 65-babyna sáıkes barlyq jer paıdalanýshylar jer telimin nysanaly maqsatyna saı paıdalanyp, topyraqtyń lastanýyna, tozýyna jáne qunarlylyǵynyń tómendeýine jol bermeýi tıis ekendigin eskertedi. Qunarly qabatty tek qajettilik týyndaǵan kezde ǵana alyp, basqa maqsatqa paıdalanýǵa tyıym salynady.

Aıta keteıik, Jetisý oblysynda memlekettik jer qoryn óz betinshe paıdalanýǵa jol berilmedi.