Pavlodar oblysynda 18 shaqyrymnan astam jol jańartyldy
ASTANA. KAZINFORM — Pavlodar oblysynda respýblıkalyq mańyzy bar «Qyzylorda — Pavlodar — Ýspenka — RF shekarasy» avtojolynyń ýchaskesinde ortasha jóndeý jumystary aıaqtaldy.
«QazAvtoJol» UK» AQ baspasóz qyzmetiniń málimetinshe, Pavlodar oblysynda respýblıkalyq mańyzy bar «Qyzylorda — Pavlodar — Ýspenka — RF shekarasy» avtojolynyń 1173–1178, 1367+260–1372+680, 1372+680–1379+150, 1381+950–1383 shaqyrym aralyǵyndaǵy ýchaskelerinde ortasha jóndeý jumystary aıaqtalyp, nysan paıdalanýǵa berildi.
— Jóndeýden ótken ýchaskeniń uzyndyǵy 18,4 shaqyrymdy quraıdy. Atalǵan jol ýchaskeleri Ib jáne III tehnıkalyq sanattarǵa jatady. Jóndeý jumystary barysynda sýyq resaıklıng tehnologııasy qoldanylyp, keıin 53 918 m2-de asfaltbeton qospasynan joǵarǵy qabat tóseldi, delingen kompanııa habarlamasynda.
Sonymen qatar, jol jamylǵysy jonylyp, 293 921 m² aýdanda jańa asfaltbeton qabaty tóseldi. Jóndeý jumystary joldy normatıvtik kúıde ustap turýǵa, sondaı-aq jol paıdalanýshylar úshin qaýipsiz ári qolaıly qozǵalysty qamtamasyz etýge múmkindik beredi.
«QazAvtoJol» UK» AQ respýblıkalyq mańyzy bar avtojoldardyń sapasyn jaqsartý boıynsha josparly jumystardy jalǵastyryp keledi.
Buǵan deıin Qaraǵandy oblysynda respýblıkalyq mańyzy bar avtojoldar jóndelip, jol boıyndaǵy servıstik nysandar jańartylyp jatqany belgili boldy.