Pavlodar oblysynda 166 dáriger jetispeıdi
PAVLODAR. KAZINFORM - Pavlodar oblysynda 166 dáriger jetispeıdi. Onyń ishinde beıindi sala mamandarynyń tapshylyǵy - 131 adam. Ásirese aýdandarda akýsher-gınekolog, reanımatolog, radıologtar óte az.
«Tapshylyq, ásirese, aýdandarda baıqalady. Akýsher-gınekologtar, reanımatologtar, radıologtar kerek. Jalpy praktıka dárigeri, qoǵamdyq densaýlyq saqtaýǵa jaýapty mamandar boıynsha da jetispeýshilik bar», - deıdi óńirlik densaýlyq saqtaý basqarmasynyń basshysy Ánýar Buırashev.
Basqarma bul máseleni sheshý úshin memlekettik baǵdarlamalardyń kómegine súıenedi. Mysal úshin «Dıplommen - aýylǵa» baǵdarlamasy boıynsha aýyldyq jerlerge jumys isteýge kelgen jas mamandarǵa 100 aılyq eseptik kórsetkish kóleminde kóterme járdemaqy tóleý qarastyrylǵan.
Sondaı-aq, aýdan ortalyqtary men aýyldyq jerlerge jumys isteýge kelgen mamandarǵa jyldyq 0,01% mólsherinde syıaqy mólsherlemesimen 15 jylǵa turǵyn úı satyp alýǵa nesıe beriledi. Aýyldyq jerlerdegi medıtsına qyzmetkerlerine 25% ústeme aqy tólenedi, sondaı-aq qatty otynmen qamtamasyz etiledi. Aqsý jáne Ekibastuz qalalarynda, aýdandarda vedomstvolyq turǵyn úı berilip keledi.
Osyndaı qoldaýlardyń nátıjesinde bıyl oblysqa jańadan 139 dáriger keledi dep kútilip otyr.
Eske sala keteıik, Pavlodarda analardyń úı jaǵdaıynda bosanýy beleń alyp barady.
