Pavlodar oblysynda 16 aýyl ishimdikten bas tartty

PAVLODAR. KAZINFORM — Ekibastuz qalasynyń aýyldyq aımaǵynda birden 15 eldi meken alkogoldik ishimdikterdi satýdan ári tutynýdan bas tartyp otyr.

Ertis-Baıan óńirinde «Saý aýyl» bastamasyna aýyldar ún qosa bastady. Máselen Ekibastuz qalasyndaǵy polıtsııa men prokýratýranyń jobasyn 15 aýyldyq okrýgtiń ákimderi qoldaǵan.

— Ekibastuzdyń Qulakól, Qarasor, Qudaıkól, № 3 bólimshe, Tórtúı, Taı, Kóksıyr, Qarajar, Myńtomar, Aqshı, Alakól, Zelenaıa Roşa, Jaqsat, Sarqamys, Qýandyq aýyldarynda endi alkogoldi ishimdik satylmaıdy. Aýyl turǵyndary da ony tutynýdan bas tartyp otyr. Birneshe jyl buryn Baıanaýyl aýdany Jańatilek aýylynyń turǵyndary da ishimdikten bas tartqan, — deıdi Ekibastuz qalasy jergilikti polıtsııa basqarmasy bastyǵynyń orynbasary Medet Beısenov.

Mysal úshin Qulakól eldi mekeninde 500-ge jýyq adam turady. Aýylda mektep, balabaqsha bar, al jergilikti turǵyndarǵa alkogol satylmaıtyn úsh dúken qyzmet kórsetedi. Jergilikti jurtshylyq bir-birine qurmetpen qaraıdy. Turǵyndardyń kúnkóris kózi — mal sharýashylyǵy, barlyǵy derlik jumyspen qamtylǵan. Aqsaqaldar ómirlik tájirıbelerin paıdalana otyryp, aýyldy abattandyrý boıynsha belsendi jumys isteıtin jastarǵa úlgi kórsetýde. Jastar aǵash otyrǵyzyp, senbilikke shyǵady. Bos ýaqyttarynda fýtbol oınap, qysta muz aıdynyn qolda quıyp, hokkeı shaıbasyn soǵady.

Aýyl turǵyndary ýchaskelik polıtsııa ınspektory, aǵa leıtenant Azat Habdýllınovke tynyshtyq pen quqyqtyq tártipti qamtamasyz etýge kúsh salǵany úshin dán rıza. Tártip saqshysy bul ýchaskede bir jyldan astam eńbek etip keledi.

— El azamattarynyń alkogolden sanaly túrde bas tartýy jáne qoǵamdyq qaýipsizdik máselelerine nazar aýdarýy aýyldyń damýyna yqpal etedi. Jergilikti dúken ıeleri men turǵyndar sanaly túrde salaýatty ómir saltyn tańdady. Kóshede mas adamdardy kezdestirý múmkin emes. Barlyǵy jumys isteıdi jáne tártipti ómir súredi. Turǵyndardyń alkogolden bas tartýy qylmystardyń bolmaýyna, quqyq buzýshylyqtar men otbasylyq janjaldardyń aldyn alýǵa yqpal etti. Júıeli jumystyń arqasynda sońǵy jyldary munda birde-bir qylmys tirkelgen joq, — deıdi Azat Habdýllınov. Al aýyl adamdary alkogolden bas tartýdyń arqasynda ózderin qaýipsiz jáne jaıly sezinetinin aıtyp ótti.

Polıtsııa mundaı aýyldardyń sany áli de óse beredi degen úmitte. Tártip saqshylary qylmyssyz qoǵam qurý boıynsha jumysty jalǵastyrý ústinde.