Pavlodar oblysynda 150 myń gektardan astam jerdi qaıta bólý kózdelip otyr
PAVLODAR. KAZINFORM — Oblys ákimdiginiń habarlaýynsha, óńirdegi barlyq aýdanda jaıylymdyq jer tapshy. Qazirgi ýaqytta jer ýchaskelerine konkýrs jarııalanǵan.
Óńirde aýyl turǵyndaryn jaıylymdyq jerlermen qamtamasyz etýge jáne ınvestıtsııalyq jobalardy iske asyrýǵa erekshe nazar aýdarylyp otyr. 2022-2025 jyldarǵa arnalǵan qaıtarylǵan jerlerdi qaıta bólý jospary — 940,6 myń gektar.
Onyń ishinde 695,1 myń gektar jer qaıta aınalymǵa engizilgen.
— Bıyl 1 shildege deıin taǵy 158,5 myń gektar jerdi qaıta bólý josparlanyp otyr. Qazirgi ýaqytta óńirde jalpy aýmaǵy 150 myń gektar jer ýchaskelerine konkýrstar jarııalandy. 15 maýsymǵa deıin Ekibastuz, Aqsý qalalarynda, sondaı-aq Jelezın jáne Ýspen aýdandarynda 61,7 myń gektar jerdi bólý boıynsha konkýrstar ótedi. Al 15-29 maýsym aralyǵynda Aqsý, Aqtoǵaı, Jelezın, Maı, Pavlodar jáne Ýspen aýdandarynda 88,1 myń gektar jer ýchaskelerin bólý jónindegi konkýrstar ótýi kerek, — dep málimdedi oblys ákimdiginen.
Baıanaýyl jáne Ýspen aýdandarynda turǵyndardyń qajettiligi úshin 2 myń gektar jer rezervke qoıyldy. Ekibastuz qalasy men Sharbaqty aýdanynda agroónerkásiptik keshen salasyndaǵy jobalarǵa 5,2 myń gektar jer bólindi. Sonymen qatar Aqsý men Ekibastuzda turǵyndardyń qajettiligi men jańartylatyn energııa kózderi salasyndaǵy jobalar úshin taǵy 1,5 myń gektardan jer rezervke qoıý josparlanyp otyr.
— Barlyq aýdanda jaıylymdyq jer tapshylyǵy bar. Qala jáne aýdan ákimderine jer qatynastary basqarmasymen birlesip, 15 maýsymǵa deıin qaıtarylǵan jerlerdi turǵyndar men aýyl sharýashylyǵy qajettiligine berýdi tolyq aıaqtaýdy tapsyryldy. Konkýrstar ótkizý kezinde zańnama talaptary qatań saqtalýy qajet. Jerlerdi qaıta aınalymǵa engizý jumysy turaqty baqylaýda bolýy tıis, — dep atap ótti óńirlik ákimdikten.
Eske sala keteıik, Almaty oblysynda 10 myń gektar jaıylym jer egistik alqabyna aınalyp jatyr.
