Pavlodar oblysynda 1,5 mln gektar jerdiń topyraq qabaty zerttelip jatyr

PAVLODAR. KAZINFORM – Mamandar sonyń arqasynda jer bonıtetin baǵalaýǵa múmkindik alady. Sondaı-aq elektrondyq jer-kadastrlyq kartalar qurylady. 

Pavlodar oblysynyń aýmaǵynda memlekettik tapsyrma sheńberinde jerdi aýqymdy zertteý jumystary júrgizilip jatyr.

– Topyraqty zertteý 707 myń gektar aýmaqty qamtıdy. Mundaı zertteý Ekibastuz qalasy aýmaǵy men Baıanaýyl aýdanynda júrgiziledi. 642 myń gektar aýmaqta aýyl sharýashylyǵy maqsatyndaǵy topyraq bonıtetin baǵalaý júrgiziledi. Bul olardyń ónimdiligi men áleýetin anyqtaýǵa kómektesedi. Topyraq bonıteti Jelezın, Maı, Baıanaýyl jáne Tereńkól aýdandarynda, Ekibastuz qalasynda aıqyndalady, - dep habarlady «Jerlerge zerttep-qaraý jumystaryn júrgizý memlekettik ınstıtýty» ShJQ RMK.

Sonymen qatar 808 myń gektarda geobotanıkalyq zertteý ótedi. Mamandar bul jaıylymdyq ósimdikterdiń quramy men jaı-kúıin zertteýge, tozǵan jáne sapasy tómendegen jaıylymdardy anyqtaýǵa múmkindik beretinin aıtady. Zertteýdiń mundaı túrimen Maı, Baıanaýyl, Aqtoǵaı jáne Ertis aýdandary qamtylady.

Nátıjesinde 1,5 mıllıon gektardan astam jerdiń topyraq quramy men geobotanıkalyq ereksheligi týraly jer-kadastrlyq kartalar qurylady. Zerttelgen jerler boıynsha málimetter jerdi utymdy paıdalaný jáne óńirdiń aýyl sharýashylyǵynyń tıimdiligin arttyrý úshin negiz bolady.

Eske sala keteıik, ShQO-da bos jatqan 64 myń gektardan astam jer memleketke qaıtaryldy.