Pavlodar oblysynda 15 myń tonna azyq-túlik saqtalyp tur

Pavlodar oblysyndaǵy turaqtandyrý qorynda jalpy somasy 3 mlrd teńge bolatyn 15 myń tonna azyq-túlik saqtalyp tur. Qordaǵy kókónis pen kartop tek aqpan aıynan jergilikti naryqta satyla bastaıdy, dep habarlaıdy Kazinform. 

Byltyr kúzde oblys kartop pen kókónisti asta-tók jınaǵany sebepti óńirde atalǵan baqsha ónimderiniń baǵasy arzan. Keıbir sýpermarketter kartoptyń kelisin 90-100 teńgeden saýdalap jatyr. Jergilikti naryqta arzan ónimniń barshylyq ekenin eskergen «Pavlodar ÁKK» AQ ázirge qaptyń aýzyn býýly kúıinde ustap otyr.

Áleýmettik-kásipkerlik korporatsııa tóraǵasynyń orynbasary Bek Orazǵulovtyń aıtýynsha, turaqtandyrý qorynyń arzan ónimderin oblys boıynsha 263 áleýmettik dúken men saýda núkteleri turaqty saýdalaıdy. Ústemeaqy 10 paıyzdan aspaýy kerek.

Al qoımadaǵy 5 mln dana qus jumyrtqasy jazǵa deıin jetedi dep josparlanyp otyr. Korporatsııa 1-sortty jumyrtqanyń ondyǵyn 426 teńgeden berse, dúkenderde ol 468 teńgeden satylyp jatyr.