Pavlodar oblysynda 15 qyrkúıekten jylý berile bastaıdy
PAVLODAR. KAZINFORM - Óńirde aldaǵy jylý berý maýsymyna daıyndyq jumystary aıaqtalýǵa jaqyn. Kelesi aptada bıýdjettik mekemeler jylý kózine qosylady.
Aýa raıyn boljaýshylar qyrkúıek aıy jyly bolady dep boljap otyrǵanyna qaramastan, 15 qyrkúıekten bastap Pavlodarda jylý beriledi.
- Jylýdy eń áýeli bıýdjettik mekemelerge berýdi josparlap otyrmyz. Bul degenimiz balabaqshalar, mektepter, aýrýhanalar, emhanalar, statsıonarlar, ıaǵnı adamdar turaqty bolatyn nysandar, sondaı-aq sport jáne mádenıet nysandary. Bıýdjettik nysandardyń júıelerin toltyryp bolǵan soń jylý turǵyn úılerge berile bastaıdy. Kún jyly ýaqytta erte qosýýdyń qajeti joq, sebebi bul jeke tutynýshylardyń qaltasyna artyq salmaq salady, - dep habarlady Pavlodar oblysynyń ákimi Asaıyn Baıhanov.
Óńir basshysy júıeni aldyn ala toltyrý tájirıbesi jalǵasatynyn atap ótti. Bul tásil arqyly jylytylǵan sý turǵyn úılerge aldyn ala jetkizilip, barlyq jylý jelilerin bir mezette toltyrýdyń qajettiligi bolmaıdy.
Búginde oblystyń úsh qalasynda 2526 kóppáterli turǵyn úı bar. Onyń 2464-i jylý maýsymyna daıyn. Al 64 úı ázirge daıyndyq aktisin alǵan joq. Qazirgi tańda daıyndyq aktileri joq úılerdiń qanshasynda basqarýshy kompanııanyń joq ekendigin anyqtaý jumystary júrgizilip jatyr.
Buǵan deıin Pavlodarda qyrkúıek aıynyń ortasy ystyq bolatynyn jazǵanbyz.
Sondaı-aq qyrkúıektiń alǵashqy onkúndiginde jylý berile bastaýy múmkin ekenin eskertkenbiz.
