Pavlodar oblysynda 15 qyrkúıekten bastap tumaýǵa qarsy vaktsınatsııa bastalady

PAVLODAR. KAZINFORM – Óńirde turǵyndardyń jalpy sanynyń keminde 10–12 paıyzyn ımmýndaý josparlanyp otyr, dep habarlaıdy Kazinform tilshisi.

Pavlodar oblysynyń densaýlyq saqtaý basqarmasynda habarlaǵandaı, eń aldymen tumaýǵa qarsy ekpeni qaýip-qater tobyndaǵy adamdar alady: sozylmaly aýrýlary bar balalar men eresekter, medıtsına qyzmetkerleri, júkti áıelder, jabyq mekemelerdegi (mektep-ınternattar, balalar úıi, sábıler úıi, múmkindigi shekteýli balalarǵa arnalǵan ınternattar) balalar, sondaı-aq qarttar úıiniń turǵyndary.

— Vaktsınalar ortalyqtandyrylyp Biryńǵaı dıstrıbıýtor («SK-Farmatsııa» JShS) arqyly satyp alynady jáne olardy Pavlodar oblystyq G. Sultanov atyndaǵy aýrýhananyń qoımasyndaǵy jaýapty tulǵalar qabyldaıdy. Jalpy sany 80 myń doza tumaýǵa qarsy vaktsına 81 mıllıon teńgege satyp alyndy, — dep málimdedi densaýlyq saqtaý basqarmasy.

Jappaı ımmýndaý 15 qyrkúıekten bastalady. Qaýip-qater tobyna kiretinder úshin ekpe tegin júrgiziledi, al qalǵandary vaktsınatsııadan óz qalaýlary boıynsha emhanalarda aqyly negizde óte alady.

Eske sala ketsek, buǵan deıin Qazaqstanda aldaǵy epıdemııalyq maýsymǵa daıyndyq bastalǵany habarlanǵan bolatyn.