Pavlodar oblysynda 15 bas jylqy urlady degen kúdikpen bir top adam ustaldy
PAVLODAR. KAZINFORM — Pavlodar oblysynyń Aqqýly aýdanynda 15 bas jylqyny urlady degen kúdikpen bir top er adam ustaldy. Kúdiktilerdiń biri ýaqytsha ustaý ızolıatoryna qamaldy.
Pavlodar oblysy Polıtsııa departamentiniń málimetinshe, jedel-izdestirý is-sharalary barysynda mal urlyǵyna qatysy bar degen kúdikke ilingen adamdar anyqtalǵan.
Tártip saqshylarynyń málimetinshe, jylqylar ıeleriniń qaraýynsyz jaıylymda júrgen jerinen urlanǵan.
— Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Sondaı-aq kúdiktilerdiń osyǵan uqsas basqa da qylmystarǵa qatysy bar-joǵy tekserilýde, — dedi Pavlodar oblysy Polıtsııa departamenti krımınaldyq polıtsııa basqarmasynyń bastyǵy Jasulan Tanjanov.
Polıtsııa tórt túlik ıelerine mal qaýipsizdigine muqııat bolýdy eskertedi. Atap aıtqanda, maldy qaraýsyz qaldyrmaý, jaıylymdardy turaqty baqylaý, janýarlardy sáıkestendirý quraldaryn paıdalaný jáne múmkindik bolsa, mal ustalatyn oryndarǵa beınebaqylaý kameralaryn ornatý usynylady.
Buǵan deıin de Pavlodar oblysynda mal urlyǵyna kúdikti top ustalǵanyn jazǵanbyz.
