Pavlodar oblysynda 144 beıindi dáriger jetispeıdi

Pavlodar oblysynyń medıtsınalyq uıymdarynda búgingi tańda 144 dáriger tapshy. Óńirlik densaýlyq saqtaý basqarmasynyń málimetinshe, aımaqtaǵy medıtsınalyq mekemelerde 1 887 dáriger jáne 4 632 orta býyn medıtsına qyzmetkeri eńbek etedi. Dárigerlermen qamtamasyz etý kórsetkishi 10 myń turǵynǵa shaqqanda 25,4 (respýblıkalyq ortasha kórsetkish — 27,7), al orta býyn mamandary boıynsha — 62,3 (respýblıkada — 75,3).

— Maman jetispeýshiligi negizinen oblystaǵy úsh qalada baıqalyp otyr. Pavlodar qalasynda 66 dáriger, Ekibastuzda 18 dáriger, Aqsýda 17 dáriger jetispese, aýdandardaǵy tapshylyq 43 maman, — dep habarlady basqarmadan.

Bıylǵy jaz aılarynda oblys ortalyǵyndaǵy keıbir emhanalarda beıindi dárigerlerge uzyn-sonar kezek qalyptasqan. Ásirese, travmotolog dárigerlerdiń jetispeýshiligi baıqalyp qaldy. Munyń sebebin óńirlik basqarma mamandary bylaı dep túsindirdi:

— Turǵyndar tarapynan jıi aıtylatyn dáriger qabyldaýyna jazylý kezeginiń uzarýy birneshe faktorǵa baılanysty. Eń áýeli jazǵy sport maýsymynda travmatologııalyq pýnktter men emhanalardyń beıindi mamandaryna júginetin azamattardyń aǵyny kúrt artady. Ekinshiden, Densaýlyq saqtaý mınıstrliginiń № QR DSM-37 buıryǵyna sáıkes, ambýlatorııalyq mamandandyrylǵan medıtsınalyq kómek Alǵashqy medıtsınalyq-sanıtarlyq kómek nemese beıindi mamandardyń joldamasy boıynsha josparly túrde kórsetiledi. Erejege saı, josparly qabyldaýdy kútý merzimi 60 kúntizbelik kúnge deıin qalyptastyrylýy múmkin, bul zańnamalyq shekke qaıshy kelmeıdi

Basqarma ókilderi sońǵy bes jylda keıbir asa tapshy mamandar boıynsha qajettilik tómendegenin atap ótti. Óńirde anestezıolog, gematolog, neırohırýrg jáne ftızıatr mamandarynyń jetispeýshiligi azaıǵan. Al dárigerlerdiń jekemenshik klınıkalarǵa, basqa óńirlerge nemese shetelge aýysýy boıynsha arnaıy statıstıka júrgizilmeıdi. Buǵan qosa, kadrlyq tolyǵý úderisi de júrip jatyr: 2025 jyly óńirdiń medıtsınalyq uıymdaryna 256 dáriger (Pavlodarda — 161, Aqsýda — 27, Ekibastuzda — 26, aýdandarda — 42) jumysqa ornalasqan.

Oblysta medıtsına kadrlarynyń tapshylyǵyn joıý maqsatynda jergilikti bıýdjet esebinen de, memlekettik baǵdarlamalar sheńberinde de qarjylaı qoldaý kórsetilip keledi. Jergilikti bıýdjet esebinen aýyldyq jerlerge keletin asa tapshy mamandyqtaǵy dárigerlerge 8,5 mln teńge (eń tómengi jalaqynyń 100 eselengen mólsheri) tólenedi. 2025 jyly bul tólemdi 34 dáriger alsa, bıyl jyldyń alǵashqy jartysynda 7 mamannyń qujattary maquldanǵan. Al Pavlodar, Ekibastuz jáne Aqsý qalalarynda jumysqa ornalasqan dárigerlerge 3,5 mln teńge beriledi.

Eske sala keteıik, elimizde eńbek kúshi tapshy óńirlerge kóshken 3,4 myńnan astam adam birjolǵy sýbsıdııa aldy.