Pavlodar oblysynda 13,7 trln teńgeniń 169 ınvestıtsııalyq jobasy júzege asyrylyp jatyr
ASTANA. KAZINFORM — Pavlodar oblysy búginde elimizdiń negizgi ınvestıtsııalyq óńirleriniń biri sanalady. Qazirgi tańda munda jalpy quny 13,7 trln teńge bolatyn 169 ınvestıtsııalyq joba iske asyrylyp jatyr. Olardyń aıasynda 24 myńnan astam jumys ornyn qurý josparlanǵan.
Pavlodarda bıznes ókilderi men memlekettik organdardyń basyn qosqan ınvestorlardyń quqyqtaryn qorǵaý jónindegi forým ótti. Qatysýshylar ınvestıtsııalyq jobalardy súıemeldeý, ákimshilik kedergilerdi joıý jáne ınvestıtsııalyq ahýaldy jaqsartý máselelerin talqylady. Investorlar ózderin tolǵandyrǵan máselelerdi tikeleı aıtyp, memlekettik organdar ókilderinen jaýap aldy.
Forýmǵa Bas prokýratýranyń Investorlardyń quqyqtaryn qorǵaý komıtetiniń tóraǵasy Baýyrjan Eraly, Pavlodar oblysynyń ákimi Asaıyn Baıhanov, Pavlodar oblysynyń prokýrory Almat Baısholaqov, memlekettik organdardyń ókilderi, ınvestorlar men bıznes-qoǵamdastyq qatysty.
Pavlodar oblysy búginde elimizdiń negizgi ınvestıtsııalyq óńirleriniń biri sanalady. Qazirgi tańda munda jalpy quny 13,7 trln teńge bolatyn 169 ınvestıtsııalyq joba iske asyrylyp jatyr. Olardyń aıasynda 24 myńnan astam jumys ornyn qurý josparlanǵan.
Investorlardyń quqyqtaryn qorǵaý komıtetiniń tóraǵasy Baýyrjan Eraly Memleket basshysynyń elimizdegi ınvestorlardyń quqyǵyn qorǵaý júıesin kúsheıtý jónindegi sheshimderiniń mańyzyn atap ótti.
— Memleket basshysynyń tapsyrmasymen Bas Prokýrorǵa Investıtsııalyq ombýdsmen ókilettikteri berilip, onyń jumys organy retinde Investorlardyń quqyqtaryn qorǵaý komıteti quryldy. Bul prokýrorlyq qadaǵalaý, ınvestıtsııalyq jobalardy súıemeldeý jáne ınvestorlardyń quqyqtaryn qorǵaý tetikterin birtutas júıege biriktirýge múmkindik berdi. Bizdiń mindetimiz — ınvestordyń máselesin kútpeı, aldyn ala joıý. Investor óziniń quqyǵy men zańdy múddeleriniń memleket tarapynan senimdi qorǵalatynyna kóz jetkizýi tıis, — dedi Baýyrjan Eraly.
Forým barysynda ınvestorlardy qorǵaýdyń negizgi tetikteri tanystyryldy. Olardyń qatarynda jobalardy súıemeldeý, prokýrorlyq súzgi, tsıfrlyq monıtorıng, Saraptamalyq keńestiń jumysy jáne ınvestıtsııalyq daýlardy sotqa deıin retteý tetigi bar. Búginde árbir ınvestıtsııalyq jobaǵa derbes prokýror bekitilip, ol jobany iske asyrýdyń barlyq kezeńinde súıemeldeıdi. Bul rette jumys tek ınvestorlardyń ótinishterine den qoıýmen shektelmeı, ákimshilik kedergilerdi ýaqytyly anyqtaýǵa baǵyttalǵan.
Pavlodar oblysynyń prokýrory Almat Baısholaqov mundaı tásilder ınvestorlardyń máselelerin tikeleı óńirlik deńgeıde sheshýge múmkindik beretinin atap ótti. Jyl basynan beri Pavlodar oblysynda ınvestorlardyń 30 máselesi sheshildi. Olar boıynsha ınvestıtsııalardyń jalpy kólemi 673,8 mlrd teńge. Bul jobalar aıasynda 4 myńnan astam jumys ornyn qurý kózdelgen.
— Pavlodar oblysy úshin ozyq tásildermen jumys isteý — ákimshilik kedergilerdi olardyń ınvestıtsııalyq jobalardyń merzimi men tıimdiligine áser ete bastaǵanǵa deıin anyqtaý mańyzdy. Investorlarmen tikeleı dıalog jáne memlekettik organdarmen ózara is-qımyl máselelerdi sol jerde jedel sheshýge múmkindik beredi, — dedi Almat Baısholaqov.
Óńirdegi ınvestıtsııalyq jumystyń praktıkalyq nátıjelerin iske asyrylyp jatqan jobalardan kórýge bolady. Aqsý qalasynda «Kronos-Pavlodar» JShS-nyń 1,9 myń iri qaraǵa arnalǵan sút-taýar fermasyn salý jobasynyń birinshi kezeńi iske asyryldy. Jobaǵa 13,7 mlrd teńge ınvestıtsııa salyndy, 120 jumys orny quryldy. Kásiporynnyń óndiristik qýaty jylyna 10 myń tonna ónim.
Taǵy bir mysal — «Qyzyljar-Qus KZ» JShS. 2024 jyly kompanııa Aqsý qalasyndaǵy quny 2 mlrd teńgeden asatyn qus fabrıkasynyń múliktik keshenin satyp aldy. Jańa ınvestor óndiristi qalpyna keltirý men jańǵyrtýǵa qosymsha 1 mlrd teńgeden astam qarajat saldy. Jylytý júıesi qaıta jańǵyrtylyp, óndiristik ǵımarattar jóndeldi jáne tehnologııalyq protsester qalpyna keltirildi. Nátıjesinde 200-den astam jumys orny quryldy, onyń 90%-yn óńir turǵyndary.
Forým qorytyndysy boıynsha qatysýshylar Pavlodar oblysynyń ınvestıtsııalyq áleýetin odan ári damytý máselelerin talqylap, jobalardy iske asyrýǵa qolaıly jaǵdaı jasaý jáne ınvestorlardyń quqyǵyn qorǵaý baǵytynda birlesken jumysty jalǵastyrýǵa daıyn ekenin rastady.
