Pavlodar oblysynda 1,2 mlrd dollarlyq jel elektr stantsııasy salynady
ASTANA. KAZINFORM- Energetıka mınıstrligi men Qytaıdyń State Power Investment Corporation (SPIC) energetıkalyq korporatsııasynyń basshylyǵy Pavlodar oblysynda qýaty 1 GVt jel elektr stantsııasyn salý jobasynyń iske asyrylý barysyn talqylady. Jobaǵa tartylatyn tikeleı sheteldik ınvestıtsııa kólemi 1,2 mlrd AQSh dollaryn quraıdy, al jel elektr stantsııasyn 2029 jyly paıdalanýǵa berý josparlanǵan.
QR Energetıka mınıstrligi baspasóz qyzmetiniń habarlaýynsha, jumys kezdesýi barysynda taraptar jobanyń qazirgi mártebesin jáne ony iske asyrýdyń aldaǵy qadamdaryn qarastyrdy.
Joba SPIC pen «Pavlodar Green Energy» JShS birlesip, Ekibastuz qalasy aýdanynda júzege asyrylyp jatyr.
Joba aıasynda qýaty 300 MVt jáne syıymdylyǵy 600 MVt·saǵ energııa jınaqtaý júıesi bar jel elektr stantsııasyn salý kózdelgen.
Jobany iske asyrý jańartylatyn energııa kózderinen óndiriletin elektr energııasynyń kólemin arttyrýǵa jáne óńirdiń energetıkalyq júıesiniń turaqtylyǵyn qamtamasyz etýge múmkindik beredi.
Kezdesý barysynda energetıka salasyndaǵy yntymaqtastyqtyń perspektıvalyq baǵyttary jáne jańa birlesken jobalardy iske asyrý múmkindikteri de talqylandy.
Kelissózder qorytyndysy boıynsha taraptar Qazaqstannyń energetıka salasyndaǵy ınvestıtsııalyq bastamalardy iske asyrý boıynsha odan ári yntymaqtastyqqa múddeli ekenin rastady.
Osyǵan deıin Kýrchatovta 2032 jylǵa deıin 700 MVt elektr stansasy salynatyny týraly habarladyq.
