Pavlodar oblysynda 1 GVt bolatyn mega-JES qurylysy bastaldy
ASTANA. KAZINFORM — Qytaı korporatsııasy Pavlodar oblysynda 1 GVt bolatyn mega-JES qurylysyn bastady. Bul týraly Engergetıka mınıstrligi habarlady.
Pavlodar oblysynyń Ekibastuz qalasy mańynda qýaty 1 GVt bolatyn jel elektr stantsııasynyń qurylysy boıynsha strategııalyq jobany iske asyrý bastaldy.
Jobany bıylǵy 29 qańtarda Energetıka mınıstrligimen qol qoıylǵan kelisimder aıasynda «State Power Investment Corporation» qytaılyq korporatsııasy men «Pavlodar Green Energy» JShS birlesip júzege asyrylyp jatyr. Qurylysqa tartylatyn tikeleı sheteldik ınvestıtsııalar kólemi 1,2 mlrd dollardy quraıdy, al nysandy paıdalanýǵa berý 2029 jylǵa josparlanǵan.
Jańa JES-tiń basty tehnologııalyq ereksheligi — qýaty 300 MVt bolatyn energııa jınaqtaý júıelerimen jabdyqtalýynda. Bul sheshim jańartylatyn energııa kózderine tán tabıǵı qubylmalylyqty tıimdi retteýge jáne elimizdiń Birtutas elektr energetıkalyq júıesine turaqty qýat berýge múmkindik beredi.
Stantsııa iske qosylǵannan keıin jylyna 3,4 mlrd kVt saǵ elektr energııasyn óndiredi, bul Qazaqstannyń energetıkalyq teńgerimin nyǵaıtýǵa aıtarlyqtaı úles qosady.
Energetıkalyq tıimdilikten bólek, jobanyń ekologııalyq mańyzy da joǵary: parnıktik gaz shyǵaryndylary jylyna 2 mln tonna SO₂-ǵa deıin azaıady dep kútilýde.
Atalǵan bastamany iske asyrý halyqaralyq seriktestiktiń tıimdiligin jáne Qazaqstannyń «jasyl» energetıka salasyndaǵy ozyq tehnologııalyq sheshimderdi endirýge daıyn ekendigin aıqyn kórsetedi.
Aıta ketelik elimizde energetıka salasynda 4 myńǵa jýyq maman tapshy.
