Pavlodar oblysynan 32 myń adam kóship ketken: ákim keri kósh sebepterin atady

ASTANA. KAZINFORM — Pavlodar oblysynyń ákimi Asaıyn Baıhanov óńirden halyqtyń kóship ketýin azaıtý jáne basqa aımaqtardan otandastardy kóshirý úshin jergilikti bılik qandaı sharalar qabyldap jatqanyn aıtty. 

Ákimniń aıtýynsha, qazirgi kóshi-qon sandary halyqtyń kelýinen kóship ketýi kóp ekenin kórsetip otyr.

— Iá, óńirden 32 myń adam kóship ketken jáne 24,5 myń adam kóship kelgen. Shamamen 8 myń adamǵa naqty azaıdy dep aıta alamyz, — dedi Asaıyn Baıhanov Ortalyq kommýnıkatsııalar qyzmetinde ótken brıfıngte.

Óńir basshysy bul jaǵdaıdyń úsh negizgi sebebin atady. Onyń aıtýynsha, birinshi sebep — Reseı Federatsııasymen shekaralas ornalasý. Sebebi kórshi eldiń qalalaryna óńir turǵyndarynyń edáýir bóligi kóship jatyr.

— Biz Reseı Federatsııasymen shekaralas óńirmiz, 5 ótkizý beketimiz bar. Jastardyń, ásirese basqa ult ókilderiniń kóbi Novosibir, Omby, Tomby, Kemerovo qalalarynda bilim alady. Olardyń 50-60 paıyzy oqýyn aıaqtaǵan soń, sol jaqta qalyp, sonda turyp jatyr, — dep túsindirdi ákim.

Ekinshi sebep — halyqtyń etnıkalyq qurylymy.

— Oblys turǵyndarynyń bar bolǵany 57 paıyzy — etnıkalyq qazaqtar, 43 paıyzy — basqa ult ókilderi. Bizdiń óńirde 90 túrli etnos ókilderi turady, — dep atap ótti Pavlodar oblysynyń ákimi.

Oǵan qosa, bul kórsetkishke óńirdegi týý deńgeıiniń tómendigi de áser etip otyr. Ákimniń aıtýynsha, mundaı jaǵdaı Qazaqstannyń soltústik óńirlerine tán.

Soǵan qaramastan, Pavlodar oblysy basqa óńirlerden qonys aýdarýshylardy tartý baǵytynda belsendi jumys júrgizip keledi.

— Biz ońtústik óńirlerden, eńbek kúshi artyq aımaqtardan qonys aýdarýmen belsendi aınalysatyn óńirlerdiń kóshbasshysy sanalamyz. Qazirgi tańda 4500 bos jumys orny bar, solarǵa Qyzylorda, Almaty, Túrkistan jáne Jambyl oblystarynan otandastarymyzdy tarttyq. Aýdan ákimdikterinen qurylǵan arnaıy toptar sol óńirlerge baryp, azamattardy ózderindegi bos jumys oryndaryna shaqyryp, «kóterme aqy», turǵyn úı usynyp, áleýmettik sıpattaǵy ózge de máselelerdi sheship keledi, — dedi Asaıyn Baıhanov.

Ákimniń aıtýynsha, qabyldanyp jatqan osy sharalardyń nátıjesinde óńirge basqa aımaqtardan 5500 qazaqstandyq jáne 1500 qandas qonystanǵan.

Eske sala ketsek, jyl basynan beri Pavlodar oblysynda turǵyndardan 90 myńnan astam ótinish tústi, onyń 70%-dan astamy sheshimin tapty.