Pavlodar oblysyn gazdandyrý: turǵyndarǵa qansha kógildir otyn qajet
PAVLODAR. KAZINFORM - Pavlodar, Ekibastuz, Aqsý qalalaryn jáne barlyq 10 aýdandy ortalyqtandyrylǵan gaz júıesimen qamtý kózdelip otyr. Gazdandyrýdyń boljamdy merzimi - 2030 jyl.
Pavlodar oblysyn gazdandyrý máselesi 2024 jyldan beri talqylanyp keledi. Sol kezde QR Energetıka mınıstrliginiń, jergilikti atqarýshy organdardyń, «QazaqGas», IOA, QTGA jáne KATEK ınstıtýtynyń ókilderi kirgen jumys toby qurylǵan bolatyn.
- Pavlodar oblysynyń ákimdigi bastapqy derekterdi joldap, sol boıynsha KATEK ınstıtýty «QazaqGaz» UK-men birlesip halyq pen ónerkásiptik tutynýshylardyń gaz tutyný esepteýlerin júrgizdi. Óńirdi gazben jabdyqtaýmen qamtýdyń eseptik baǵasy jasaldy. KATEK ınstıtýty Pavlodar oblysyn gazıfıkatsııalaý shemasyn ázirledi, - dep habarlady óńirlik energetıka jáne turǵyn úı-kommýnaldyq sharýashylyq basqarmasy ekonomıkanyń naqty sektory bólimi basshysynyń mindetin atqarýshy Álisher Temirtas.
Pavlodar oblysyna qajetti jyldyq jalpy gaz kólemi - 1,5 mıllıon tekshe metr. Ony jeke sektor turǵyndary da, kásipkerler de paıdalana alady dep josparlanǵan.
- Gaz qubyrlarynyń qurylysy kezinde aımaqqa qosymsha ınvestıtsııalar tartýǵa múmkindik beredi jáne tabıǵı gazben jumys isteıtin jańa kásiporyndardyń ashylýyna jol ashady. Mańyzdy faktorlardyń biri — ekologııalyq jaǵdaıdyń jaqsarýy, bul bizdiń óńir úshin óte ózekti. Budan bólek, gazdandyrý jylý energııasynyń tapshylyǵyn joıýǵa, energııa jelilerine túsetin júktemeni azaıtýǵa múmkindik beredi, - dep tolyqtyrdy basqarma ókili.
Qazirgi ýaqytta Pavlodar oblysyna gaz jetkizýdiń tek bir ǵana shemasy bekitilgen. Ol Reseıdiń Omby óńirinen Ertis ózeniniń boıymen Abaı oblysyna qaraı ótedi. Jospar boıynsha Pavlodar, Ekibastuz, Aqsý qalalaryn, sondaı-aq barlyq aýdan ortalyqtaryn qamtý kózdelýde. Onyń ishinde Baıanaýyl, Sharbaqty, Ertis, Aqtoǵaı, Ýspenka aýyldaryna tarmaqtar tartylady.
Óńirdi gazdandyrýdyń boljamdy merzimi - 2030 jyl. Bul orta merzimdi perspektıva jáne kógildir otyndy jetkizýdiń ekinshi nusqasy da bar.
Eger kórshiles Reseımen kelisimge kelý múmkin bolmasa, gaz qubyry elorda jaǵynan tartylýy múmkin. Barlyq ýaǵdalastyqtar jasalǵannan keıin jobany qarjylandyrýdyń naqty somasy belgili bolady.
Buǵan deıin óńirlerde kógildir otynǵa qoljetimdilik artyp kele jatqanyn jazǵanbyz.