Pavlodar oblysy TJD bastyǵy: Oıyq astynda bos keńistikter bolýy múmkin
PAVLODAR. KAZINFORM - Altyn kenishiniń túbine túsirilgen shaǵyn ekskavator óte saq jaǵdaıda jumys istep jatyr. Kesheden beri topyraq astynan avtobýstyń synǵan bólshekteri, ottegi ballony, tynys alý apparaty tabyldy.
«Maıqaıyńaltyn» AQ aýmaǵynda jumystar barlyq qaýipsizdik sharalary saqtala otyryp júrgizilýde. Aýyr tehnıkamen shuńqyrdyń shetine apparel tóseldi jáne saqtandyrý kabeli boıynsha shaǵyn gabarıtti ekskavator túsirilgeni jaıynda buǵan deıin habarlaǵanbyz. Alaıda tótenshelikter qazirgi kúni qaýipti jaǵdaılar saqtalyp otyrǵanyn habarlady.
«Avtobýstyń boljamdy ornalasqan jerinde bos oryndardyń bolýy jáne izdeý jumystaryn júrgizý kezinde qaıta qulaý qaýpi bolǵandyqtan, barlyq mamandardyń ómirlerine úlken qaýip tónýde. TJM mamandary halyqaralyq tájirıbeni zerdelep, taıaý elderdiń mamandarymen, sondaı-aq Qazaqstan TJM ardagerlerimen keńester ótkizdi. Avtobýstyń boljamdy ornalasqan jerinde qazba jumystary jalǵasýda. Onyń barysynda avtobýstyń synǵan bólshekteri, ottegi ballony, tynys alý apparaty jáne qutqarýshynyń sómkesi tabyldy. Topyraq pen taý jynystary únemi qozǵalyp, syrǵyp jatyr. Olardy naqty ýaqytta anyqtaıtyn apparat oıyq jıegine ornatylǵan» dep málimdedi Pavlodar oblysy tótenshe jaǵdaılar departamentiniń bastyǵy Jasulan Jumashev.
Mamandar avtobýs ishinde bolǵan eki qutqarýshyny áli de tappaı jatyr.
Aldyńǵy kúni oıyq túbin qazyp jatqan shaǵyn ekskvator avtobýstyń shanaǵy men qutqarýshylar sómkesin tapqany týraly habarlaǵan edik https://kaz.inform.kz/news/maykayindagi-apat-avtobustin-shanagi-men-kutkarushilardin-somkes-tabildi-9934a6/
Eske sala keteıik, 4 qańtar kúni «Maıqaıyńaltyn» ken ornynda úlken oıyq mańyndaǵy topyraq opyrylyp, 4 adam mingen avtobýs jerdiń astyna túsip ketken bolatyn.
Keıin oqıǵa ornynan eki adamnyń denesi tabyldy.
