Pavlodar oblysy sý tasqynynan zardap shekken aımaqtarǵa 150 tonnadan astam gýmanıtarlyq kómek jiberdi
PAVLODAR. KAZINFORM - Búgin túste jalpy kólemi 60 tonna zattar men taýarlar tıelgen kerýen jolǵa shyqty. Kezekti kómek Petropavl qalasyna jetkiziledi.
«AMANAT» partııasy óńirlik fılıalynyń málimetinshe, 60 tonna tıelgen úsh júk kóligi Pavlodar men Ekibastuz qalalarynan Petropavl qalasyna attandy. Kórshi óńirge gýmanıtarlyq kómekti jınaýǵa janashyr turǵyndar, kásipkerler, birneshe saıası partııa ókilderi men Qazaqstan halqy Assambleıasynyń músheleri, «Ertis» fýtbol klýby, Aýǵan soǵysynyń ardagerleri, eriktiler jáne t.b. qol ushyn sozdy.
Buǵan deıin tasqyn sýdan zardap shekken kórshi óńirlerge Jastar bastamalaryn damytý ortalyǵynan 13 tonna, «Respýblıka» partııasy men «Jebe» qoǵamdyq birlestigi atynan 40 tonna, depýtattar, «AMANAT», Qazaqstan halqy Assambleıasynyń músheleri, kásipkerler atynan 20 tonna, sondaı-aq Pavlodar munaı-hımııa zaýyty tarapynan 20 tonnaǵa jýyq kómek jóneltilgen bolatyn. Azyq-túlik, jyly kıimder, kórpe, ydys-aıaq, kúrek, motopompa, qap, sorǵy jáne basqa da qajetti qural - jabdyqtar jetkizilip jatyr.
Pavlodar oblysynyń jurtshylyǵy osy ýaqytqa deıin 150 tonnadan astam gýmanıtarlyq kómek kórsetti.
