Pavlodar oblysy aýmaǵyndaǵy qaraǵaıly ormanǵa 14 jerden jaı oty túsken
PAVLODAR. KAZINFORM — 2 maýsym kúni «Ertis ormany» tabıǵı rezervaty aýmaǵynda naızaǵaıdyń túsýinen keıin 14 órt jaǵdaıy tirkelgen.
Tilsiz jaýdy aýyzdyqtaýǵa 150 adam men 46 tehnıka jumyldyryldy.
— Órt oqıǵalarynyń 12-si ormandy jerlerde, ózgesi dalaly jerlerde boldy. Ony óshirýge 46 birlik tehnıka, atap aıtqanda, 21 avtotsısterna, 12 traktor, 13 shaǵyn órt sóndirý kesheni qoldanyldy. Jalpy sany 150 adam jumyldyryldy, onyń 117-si orman kúzetinen, ózgesi — «Qazavıaormanqorǵaý» desanty men tótenshe jaǵdaı qyzmetkerleri. «Qazavıaormanqorǵaý» tikushaǵy áýeden 4 ret sý tókti. Orman kúzeti men qyzmetterdiń úılesimdi is-áreketiniń arqasynda órt úlken aýmaqqa taralmaı, ýaqtyly aýyzdyqtalyp, óshirildi. Órt shalǵan jerlerdiń jalpy aýmaǵy men kelgen shyǵyn anyqtalyp jatyr, - dep habarlady rezervattyń baspasóz qyzmetinen.
Buǵan deıin Ertis boıy orman sharýashylyqtarynyń órtke qarsy áleýeti álsiz ekeni týraly jazǵanbyz.