Pavlodar oblysy ákiminiń ýádesi: 2026 jyly Aqsý qalasyna erekshe nazar aýdarylady
ASTANA. KAZINFORM – Keler jyly Aqsýdy abattandyrýǵa qomaqty qarajat bólinedi. Bul týraly Jibek Joly telearnasynyń «Ýáde» baǵdarlamasynda Pavlodar oblysynyń ákimi Asaıyn Baıhanov málim etti.
– Qazir Pavlodar qalasy men Ekibastuzdy abattandyrý jáne kórkeıtý jaǵynan jaǵdaı jaman emes. Biraq Aqsý qalasynda bul jumystar osy deńgeıge jetpegen, ıaǵnı abattandyrý jaǵynan durys kóńil bólinbedi, - dedi A. Baıhanov.
Osy oraıda ol bul qalada balalardyń oıyn alańdary tapshy ekenin moıyndady.
– Sondyqtan 2026 jyly Aqsý qalasyna erekshe nazar aýdarylady dep ýáde beremin, - dedi oblys ákimi.
Eske sala keteıik, buǵan deıin Aqsý qalasynyń temirjol vokzaly jańartylyp jatqanyn jazǵan edik. Munda perron alańyn abattandyrý, platformany jańǵyrtý, halyqtyń qozǵalysy shekteýli toptary úshin vokzaldy beıimdeý, bólmelerdiń ishki árleý jumystary qarastyrylǵan. Óńirlik jolaýshylar kóligi jáne avtokólik joldary basqarmasynyń dereginshe, barlyq jumystar «Qazaqstan temir joly» ulttyq kompanııasymen kelise otyryp júrgizilip jatyr.