Pavlodar oblysy ákiminiń orynbasaryn bopsalaǵan áıel 3 jylǵa bas bostandyǵynan aıyryldy

PAVLODAR. KAZINFORM - Ol oblys ákiminiń orynbasarynan iri kólemde aqsha talap etken. Al laýazym ıesi oǵan kómek retinde jalpy somasy 4,8 mln teńge qarajat aýdarǵany anyqtaldy.

Buǵan deıin habarlaǵanymyzdaı, naýryz aıynda Pavlodar oblysy ákiminiń birinshi orynbasary Serik Batyrǵojınovty bopsalaý boıynsha qozǵalǵan is sotqa jiberildi. 

Qylmystyq istiń qozǵalýyna laýazym ıesiniń ótinishi sebep bolǵan edi. Buǵan deıin áleýmettik jelilerde Serik Batyrǵojınovtyń ótken jazda eki balanyń anasyn zorlaǵany týraly aqparat tarap ketken. Laýazym ıesi bul aıyptaýmen kelispeı, áıeldi sotqa berdi. Pavlodar oblysynyń qylmystyq ister jónindegi mamandandyrylǵan aýdanaralyq soty alqabılerdiń qatysýymen K.-ǵa qatysty asa iri mólsherde qorqytyp alý faktisi boıynsha qylmystyq isti qarady.

Belgili bolǵandaı, áıel adam byltyrǵy sáýir aıynan «múgedek balalary bar nemese olardy tárbıelep otyrǵan otbasylar» sanaty boıynsha turǵyn úı alýǵa kezekte turǵan. Ol áleýmettik jelide S.Batyrǵojınovpen tanysyp, onyń qabyldaýynda bolǵan. Keıin aralasa bastaǵan. 2023 jyldyń mamyr-qyrkúıek aılary aralyǵynda Batyrǵojınov materıaldyq kómek túrinde K.-ǵa 50 000 teńgeden 160 000 teńgege deıin aqshalaı qarajat aýdarǵan. Áıel bara-bara aqsha suraýdy údete túsip, onyń bedelin túsiretin aqparatty taratamyn dep bopsalaǵan. Sóıtip óz esepshotyna jalpy somasy 4 812 000 teńge aýdartyp alǵan. Al ótken jyldyń qarasha aıynda 20 mln teńge talap etken.

Sotta alqabıler K.-ny QR Qylmystyq kodeksiniń 194-baby 4-bóligi 2-tarmaǵy boıynsha kináli dep tanyldy.

Sot áıel adamnyń buryn sottalmaǵanyn, asyraýynda kámeletke tolmaǵan balasy bar ekenin jáne jeke basynyń aýyr jaǵdaılarynyń jıyntyǵy boıynsha qylmys jasaǵanyn eskere otyryp, Qylmystyq kodekstiń 55-baby 4-bóliginiń negizinde oǵan 3 jylǵa bas bostandyǵynan aıyrý jazasyn taǵaıyndady.

Sot úkimi zańdy kúshine engen joq.