Pavlodar oblysy ákiminiń birinshi orynbasaryn bopsalaý boıynsha qozǵalǵan is sotqa jiberildi

PAVLODAR. KAZINFORM - Qylmystyq istiń qozǵalýyna oblys ákiminiń birinshi orynbasary Serik Batyrǵojınovtyń ótinishi sebep bolǵan. Ol ózine jala jabyldy dep esepteıdi.

Buǵan deıin áleýmettik jelilerde Serik Batyrǵojınovtyń ótken jazda eki balanyń anasyn zorlaǵany týraly aqparat tarap ketken edi. Laýazym ıesi bul aıyptaýmen kelispeı, áıeldi sotqa berdi.

Pavlodar oblysy ákiminiń baspasóz qyzmeti atalǵan oqıǵa boıynsha kelesideı habarlama jasady:

«Pavlodar oblysy ákiminiń birinshi orynbasary Serik Batyrǵojınov bıylǵy 8 qańtardan qazirgi ýaqytqa deıin densaýlyq jaǵdaıyna baılanysty demalysta. Bizdegi aqparat boıynsha Pavlodar oblysynyń polıtsııa departamenti jeke tulǵa Serik Batyrǵojınovtyń ótinishine sáıkes bopsalaý faktisi boıynsha qylmystyq is qozǵady. Jábirlenýshi tarap - Serik Batyrǵojınov» dep málimdedi baspasóz qyzmetinen.

Atalǵan is boıynsha tergeý jumystary júrgizilgen. Aıyptaýshy taraptyń usynǵan faktileri tekserilgen jáne rastalmaǵan. Búginde is sotqa jiberildi.

Eske sala keteıik, Pavlodar oblysy ákiminiń birinshi orynbasary qańtar aıynda jol-kólik apatyna ushyrady.