Pavlodar oblysy ákiminiń birinshi orynbasary jol-kólik apatyna ushyrady

Pavlodar oblysy ákiminiń birinshi orynbasary Serik Batyrǵojınov Maıqaıyń-Pavlodar avtojolynda qyzmettik avtokóligimen jol apatyna ushyrady, dep habarlaıdy Kazinform. 

Jol-kólik apatynyń bolǵany týraly Pavlodar oblysy ákimi baspasóz qyzmetiniń basshysy Saltanat Ákimbekova rastady. Oqıǵa 9 qańtar kúni bolǵan. Serik Barlybaıuly Maıqaıyńdaǵy oqıǵa boıynsha qurylǵan jedel shtabtyń múshesi retinde altyn kenishinde júrgen. Sol kúni keshkilik qyzmettik kóligimen Pavlodar qalasyna jolǵa shyǵady. Asfalttyń taıǵaq bolýynan jeńil tehnıka júrgizýshige baǵynbaı, joldan shyǵyp ketip, aýnaǵan.

«Pavlodar oblysy ákiminiń birinshi orynbasary Serik Batyrǵojınov pen kólik júrgizýshisi din aman. Tek Serik Barlybaıuly azdap jeńil jaraqat alǵan. Densaýlyǵyna tónip turǵan eshqandaı qater joq», - deıdi baspasóz qyzmetiniń basshysy.

Al óńirlik polıtsııa departamenti atalǵan jol-kólik oqıǵasy jaıynda jol polıtsııasynda eshqandaı derek tirkelmegenin habarlady.

Serik Batyrǵojınov atalǵan laýazymdy 2023 jyldyń qarasha aıynan atqaryp keledi. Buǵan deıin birneshe aýdannyń basshysy, Pavlodar oblysy ákiminiń orynbasary qyzmetinde bolǵan.