Pavlodar oblysy ákiminiń ápkesi mas kúıinde kólik júrgizgeni úshin jazalandy

PAVLODAR. KAZINFORM — Ekibastuz qalasynyń soty Pavlodar oblysynyń ákimi Asaıyn Baıhanovtyń ápkesin mas kúıinde kólik júrgizgeni úshin 15 táýlikke qamaýǵa alý týraly qaýly shyǵardy. Sondaı-aq ony 7 jylǵa júrgizýshi kýáliginen aıyrdy.

Ákimniń 53 jasar ápkesine qatysty ákimshilik is Ekibastuz qalalyq sotynda qaralǵan. 
Qaýlyda aıtylǵandaı, eki patrýldik polıtseı Petrenko kóshesinde A.Baıhanova tizgindegen Hyundai Tucson avtokóligin toqtatqan. Avtokólik salonynda ol jalǵyz bolǵan. Júrgizýshiden alkogoldiń ıisi shyqqanyn ańǵarǵan tártip saqshylary ony medıtsınalyq kýálandyrýǵa jiberýge sheshim qabyldady. Dárigerler mas bolýdyń jeńil dárejesin anyqtaıdy. Sáıkesinshe polıtseıler kólikti mas kúıinde júrgizý deregi boıynsha ákimshilik hattama toltyrady.

— Biraq ol sátter beınejazbaǵa túsirilmegeni anyqtaldy. Al A.Baıhanova sotta kólik salonyndaǵy beınetirkegishi únemi qýat kózinde turatynyn, toqtaǵan sátte ol qýat kózinen ajyrap, túsirmeı qalǵanyn jetkizgen. Bul ýaqytta polıtseılerdiń beınejetondary da tehnıkalyq aqaýǵa baılanysty jumys istemeı turǵan, - dep jazylǵan sot qaýlysynda.

A.Baıhanova sotta óziniń sol sátte mas bolǵanyn moıyndaǵan, biraq kólik rýlinde otyrmaǵanyna sendirgisi kelgen. Aıtýynsha, ol Hyundai Tucson kóliginiń alǵy jaǵynda jolaýshy oryndyǵynda jylynyp otyrǵan.

— Polıtsııa qyzmetkerleri oǵan kelgen sátte ol kóliktiń salonynda otyrǵanyn, mas kúıinde bolǵanyn rastady. Onyń mas kúıinde bolý deregi daý týdyrmaıdy. Avtokólikti basqarmaǵanyn, qozǵaltqyshty iske qospaǵanyn málimdeıdi, — delingen sot qaýlysynda.

Sot kólik júrgizýshiniń kinási dáleldendi dep qorytyndylaı kele, ony 15 táýlikke qamaýǵa alý jáne kólik júrgizý quqyǵynan 7 jylǵa aıyrý jazasyn taǵaıyndady.

Bul jaıtqa qatysty óńir basshysy Asaıyn Baıhanov óz pikirin bildirdi.

— Meniń úlken ápkemniń ákimshilik jaýapkershilikke tartylýyna qatysty mynany aıta alamyn: barlyq azamattar zań aldynda teń. Meniń ápkem de, otbasymyzdyń basqa músheleri sııaqty, bul qaǵıdattan tys emes, — dep jazdy aımaq basshysy threads jelisindegi jeke paraqshasynda.

Eske sala keteıik, BQO-da esirtkige mas kúıinde rýlge otyrǵan júrgizýshi sottaldy.