Pavlodar oblysy agrarlyq salaǵa ınvestıtsııa tartý kólemi boıynsha kóshbasshy – ákim

ASTANA. KAZINFORM – Pavlodar oblysynda 815 mlrd teńgege jýyq ınvestıtsııa tartyldy, bul ótken jylǵy kórsetkishten 30%-ǵa joǵary. Bul týraly oblys ákimi Asaıyn Baıhanov málim etti.

«Bıyl 10 aıdyń qorytyndysy boıynsha óńirimizdiń negizgi makrokórsetkishteri oń dınamıkaǵa ıe. Ónerkásip óndirisiniń kólemi 2,8 trln teńgege jetti, al óńdeý sektory 8,2%-ǵa ósti. Bizdiń aımaq – elimizdegi óńdeýshi ónerkásip boıynsha úzdik úshtikke kiredi, sondaı-aq shıkizattyq emes eksport kólemi boıynsha 5-shi orynda. Biz 815 mlrd teńgege jýyq ınvestıtsııa tarttyq, bul ótken jylǵy kórsetkishten 30%-ǵa joǵary. Investıtsııanyń ósý qarqyny boıynsha respýblıkada biz 2 orynda bolsaq, agrarlyq salaǵa ınvestıtsııa kólemi boıynsha óńirler arasynda kóshbasshymyz», - dedi Asaıyn Baıhanov Ortalyq kommýnıkatsııalar qyzmeti alańynda ótken baspasóz máslıhatynda. 

Onyń aıtýynsha, óńirge ınvestıtsııanyń 88 paıyzy jeke kompanııalar esebinen tartylǵan.

«Aımaqta qolaıly ınvestıtsııalyq orta qalyptasqan dep aıtýǵa bolady. Qazir 10 myńnan astam jańa jumys ornyn ashatyn 2,8 trln teńgege 140 ınvestıtsııalyq jobalar pýly bar», - deıdi ol.

Osyǵan deıin Pavlodar oblysynda rekordtyq deńgeıde astyq jınalǵanyn habarladyq.