Pavlodar oblysy 2027 jylǵa qaraı respýblıkalyq sýbventsııalardy alýdan bas tartady

PAVLODAR. KAZINFORM - Ertis-Baıan óńiri qarjylyq derbestikke qol jetkizýdi jáne aldaǵy ýaqytta donor-aımaq mártebesin alýdy josparlap otyr.

Bul týraly Pavlodar oblystyq ákimdiginen habarlandy.

- Óńirge tartylǵan ınvestıtsııalar men jańa serpindi óndiristerdiń iske qosylýynyń arqasynda Pavlodar oblysy 2027 jylǵa qaraı respýblıkalyq sýbventsııalardy alýdan bas tartyp, qarjylyq derbestikke qol jetkizýdi jáne aldaǵy ýaqytta donor-aımaq mártebesin alýdy josparlap otyr, - dep málimdedi ákimdikten.

Al Ulttyq ekonomıka mınıstri Serik Jumanǵarın 2026-2028 jyldarǵa arnalǵan jalpy sıpattaǵy transfertter kólemine qatysty zań jobasyn tanystyrý barysynda bul 2028 jyly múmkin bolady degen boljam aıtty.

«2028 jyly Pavlodar oblysy ózin-ózi qamtamasyz etedi, al Mańǵystaý oblysy qaıtadan donor bolady», – dedi ol.

Bul óńirlik salyq bazasynyń ózgerýimen, ónerkásip pen ınvestıtsııa kólemderiniń artýymen baılanysty. Aımaqtar arasyndaǵy bıýdjettik teńgerimdi qaıta bólý – ekonomıkalyq ta, saıası da salmaqty qadam.

Buǵan deıin Pavlodardyń qoǵamdyq kólik salasy qansha sýbsıdııa ıelenip otyrǵanyn jazǵanbyz.