Pavlodar-Nur-Sultan tasjolynda qar qursaýynda qalǵan kólikter: Ákim keńes ótkizdi
PAVLODAR. QazAqparat - Pavlodar oblysynyń ákimi Ábilqaıyr Sqaqov Pavlodar – Nur-Sultan tas jolyndaǵy jaǵdaı boıynsha keńes ótkizdi. Bul týraly QazAqparat ákimdiktiń baspasóz qyzmetine silteme jasap habarlaıdy.
Ótken aptanyń sońyndaǵy qatty borannyń saldarynan Pavlodar oblysyndaǵy avtomobıl joldarynda respýblıkalyq trassalardaǵy 9 ýchaskeniń 8-in, óńirlik mańyzy bar joldardaǵy 13 ýchaskeniń 12-in jabýǵa týra keldi. 4 blokpostta 200-den astam avtokólik qar qursaýynda turyp qaldy. 150-den astam jolaýshysy bolǵan 76 mashına júrgizýshilerine kómek kórsetildi.
Tótenshe jaǵdaılar departamentiniń bastyǵy Ernur Ótegenov osyndaı jaǵdaıǵa ákep soqtyrǵan úsh negizgi máseleni atap ótti: joldardyń belgili bir bólikterinde qar toqtatýdyń uıymdastyrylmaýy, joldardyń jabylýy týraly halyqty ýaqtyly habardar etpeý jáne jol qyzmetterinde osyndaı jaǵdaılarǵa qajetti aýyr tehnıkanyń bolmaýy.
«Búginde Pavlodar – Nur-Sultan tasjoly boıynda elorda baǵytynda 14, al keri baǵytta taǵy 9 kólik qalyp otyr. Olardyń jalpy uzyndyǵy 10 shaqyrymǵa jýyq, - deıdi «QazAvtoJol UK»AQ oblystyq fılıalynyń jetekshisi Aqylbek Qabyldın,- joldy eki kún ishinde retke keltirýdi josparlap otyrmyz, alaıda erteń taǵy da boran bolý yqtımaldyǵy boljamdalyp otyr. Eger ol kedergi keltirmese, biz jol qozǵalysyn tolyq qamtamasyz etemiz.
Qar toqtatýǵa keler bolsaq, «QazAvtoJol» kompanııasynyń oblystyq fılıalynda aktsıonerlik qoǵam tarapynan bul maqsattarǵa qajetti qarjylandyrýdyń joqtyǵyn aıtty.
«Aýa raıynyń boljamy der kezinde jetkizilgenine qaramastan, barlyq qyzmetter derlik jaǵdaıdy jete baǵalaı almaǵany saldarynan, bir táýlik boıy adamdar joldarda qaldy. Mundaı jaǵdaılar týyndaýyna qatysty jergilikti organdarda eshqandaı da josparlaýdyń joqtyǵy kórinip tur. Ákimderdiń aýyr tehnıkany aldyn ala daıyndaý týraly qamdanbaǵandyqtan, iri kásiporyndarymyzdan shuǵyl túrde kólik suraýymyzǵa týra keldi. Aýdandardaǵy aýyl sharýashylyǵy ónimderin óndirýshilerdiń aýyr tehnıkasy bar, joldardy tazalaýǵa sony tartýǵa bolar edi», - dep qorytyndylady aımaq basshysy.
Ábilqaıyr Sqaqov sharýashylyq júrgizýshi sýbektilerden, iri kásiporyndar men sharýa qojalyqtarynan qoldanystaǵy barlyq arnaıy tehnıkany qosý shemasyn ázirleýdi jáne aýa raıy buzylyp, joldardaǵy kórinis tómendegen jaǵdaıda eldi mekenderden shyǵatyn jerlerdi qadaǵalaýdy kúsheıtýdi tapsyrdy. Sondaı-aq, ákim júrgizýshilerdiń qutqarýshylarǵa 112 nómiri boıynsha habarlasa almaǵandyqtaryn habarlaǵan shaǵymdarǵa nazar aýdardy – bul faktiler boıynsha qyzmettik tekserý júrgizilmek.
