Pavlodar murajaıynda ataqty kúıshilerdiń 20-ǵa jýyq dombyrasy saqtaýly

PAVLODAR. QazAqparat - Qazaq saz aspabynyń biregeıi qudiretti qara dombyranyń bir jarym myń jyldyq tarıhy bar desedi. Ultymyzdyń tól aspaby jaıynda ańyz áńgimeler de kóp. Bizge ata-babalarymyzdan mura bolǵan kúıler qanshama. Onyń árbiriniń óz zamanyna saı tarıhy bar. Bunyń sol kúılerdi oryndaǵan dombyraǵa da qatysy bolsa kerek. Pavlodarda ataqty adamdarǵa shabyt bergen jıyrmaǵa jýyq dombyra bir jerge toptastyrylǵan, dep habarlaıdy QazAqparat «Habar 24» telearnasyna silteme jasap.

Buqar jyraý atyndaǵy ádebıet jáne óner mýzeıiniń qorynda elimizge tanymal óner sańlaqtary, aqyn-jazýshylardyń dombyralary saqtalǵan. Máselen, Meıram Asylǵazın, Baıǵabyl Jylqybaev, Nutfolla Shákenov, Káýken Kenjetaev jáne Muzafar Álimbaevtyń dombyralary tur. Mýzeıdiń irgesi qalanǵan 90-jyldary jádigerler oblys turǵyndarynan jınalǵan.

Olardyń arasynda shyǵý deregi beımálim kóne dombyra da bar. Aspaptyń pishini Mońǵolııanyń Altaı taýlaryndaǵy úńgir tastan tabylǵan kóne aspapqa keledi. Úńgirden tabylǵan dombyra besinshi ǵasyrǵa tıesili eken. Onyń moınynda rýna jazbasynan aýdarǵanda: «Jupar kúı áýeni bizdi súıispenshilikke bóleıdi» degen jazý bar.

«Osy sózderdiń ózine qarap otyryp dombyranyń qanshama jyldyq tarıhy bar ekenin kórýge bolady. Dombyra qazaqtyń muńyn, zaryn, salt-dástúrlerin, tarıhyn saqtap, bizge jetkizip otyrǵan uly aspaptardyń biri», - deıdi Buqar jyraý atyndaǵy ádebıet jáne óner mýzeıiniń ǵylymı qyzmetkeri Erbol Qaıyrov.