Pavlodar munaı zaýytynda jóndeý jumystary merziminen buryn aıaqtaldy

NUR-SULTAN. QazAqparat - Pavlodar munaı-hımııa zaýyty jóndeý jumystaryn merzimnen buryn aıaqtap, iske qosý operatsııalaryn bastady. Bul týraly «QazMunaıGaz» UK» AQ-nyń baspasóz qyzmetinen málim etti, dep habarlaıdy QazAqparat.

1 qarashadan «PMHZ» JShS barlyq ónim túrlerin qaıta shyǵara bastaıdy. Qolaısyz klımattyq jaǵdaılarǵa qaramastan, zaýyt jóndeý jumystaryn merzimnen buryn oryndap shyqty.

«Barlyǵy 933 birlik tehnologııalyq qubyrdyń, 19 birlik tehnıkalyq bý qubyrdyń jáne 300 birlik qural-jabdyqtyń tehnıkalyq kýálandyrylýy, revızııasy men saraptamasy júrgizildi. Zaýytty jóndeý barysynda birqatar iri jumystar atqaryldy: munaıdy bastapqy óńdeý óndirisinde kolonna aýystyryldy, quramynda sýtegi bar gaz jelisi men sý qaınatqyshy jóndeldi, munaıdy tereń óńdeý óndirisinde peshterdiń gaz ótkizgishteri, transferlik jeli, qosarlanǵan jylý almastyrǵysh pen separatorlar aýystyryldy. Munaıdy bastapqy jáne tereń óńdeý óndiristerinde bıiktigi 180 jáne 120 metr tútin murjalarynyń korrozııaǵa qarsy qorǵaý jumystaryn atap ótken jón. Jóndeýge kásiporyn qyzmetkerlerinen bólek, merdigerlik uıymdardyń 1241 jumyskeri jumyldyryldy», - delingen kompanııa málimetinde.

Aıta keteıik, bıyl Pavlodar munaı-hımııa zaýytyn jóndeý jumystarynyń merzimi úsh ret keıinge qaldyrylǵan bolatyn.