Pavlodar munaı óńdeý zaýytyna Reseıdiń qysqartqan munaıyn Qazaqstan ózi jetkizip turady - S.Myńbaev
ASTANA. 21 mamyr. QazAqparat - Pavlodar munaı óńdeý zaýyty úshin Reseıdiń qysqartqan munaıyn Qazaqstan óziniń jetkizilimderi arqyly tolyqtyratyn bolady.
Bul týraly búgin Úkimet otyrysynan keıin QR Munaı jáne gaz mınıstri Saýat Myńbaev málim etti.
Aıta keteıik, Reseı tarapy Pavlodar munaı óńdeý zaýytyna munaı jetkizilimderin 2 esege qysqartqan bolatyn.
«Pavlodarǵa munaı tasymaly boıynsha másele shynymen de týyndap otyr. Biraq ta zaýyt jumysyn toqtatpaıdy. Іshki naryqta ahýal ázirge qalypty. Eger de Pavlodarǵa reseılik munaı jetkizilmese, tehnıkalyq múmkindiktermen osy qajetti kólemdi el ishindegi tasymalmen aýystyryp jáne daıyn munaı ónimderiniń ımportymen tolyqtyrýǵa tyrysamyz»,-dedi mınıstr.
S. Myńbaevtyń aıtýynsha, atalǵan kórshi elden jetkizilimder túrli sebeptermen qysqaryp otyr. Onyń ishinde eki memlekettiń arasynda munaı tasymaly týraly kelisimge qol qoıýdyń kesheýildeýine baılanysty eken.
«Kelisimge qashan qol qoıylatynyn biz bilmeımiz. Bul keshigý - Reseı jaǵyndaǵy uıymdastyrý máselelerine qatysty bolyp otyr. Onda jańa taǵaıyndaýlar júrip jatyr. Biz atalǵan qujatty bekitýge úmittimiz. Alaıda, bul turǵyda Reseıdiń óziniń múddesi , al bizde ózimizdiń múddemiz bar»,-dep túıindedi S. Myńbaev.
