Pavlodar munaı-hımııa zaýytynda jumys ýaqytsha toqtaıdy
ASTANA. KAZINFORM — Pavlodar munaı-hımııa zaýyty 2025 jylǵy josparly aldyn alý jumystaryna daıyndalyp jatyr.
Pavlodar munaı-hımııa zaýyty (PMHZ, «QazMunaıGaz» UK AQ enshiles kásiporny) bıyl 18 maýsym men 17 shilde aralyǵynda josparly aldyn alý jumystaryn júrgizýdi josparlap otyr. Bul jumys «Azamattyq qorǵaý týraly» QR Zańynyń talaptaryn jáne ónerkásiptik qaýipsizdikti qamtamasyz etý erejelerin saqtaý úshin oryndalady. Qysymmen jumys isteıtin jabdyqqa (110 birlikten astam), sondaı-aq tehnologııalyq qubyrlarǵa (930 birlikten astam) mindetti tehnıkalyq kýálandyrý jáne saraptama júrgizý josparlanǵan.
– Josparly aldyn alý jumystary QR Energetıka mınıstrligi 2025 jylǵa bekitken kestege sáıkes júrgiziletin bolady. Josparly aldyn alý jumystaryna 1100-den asa adam jáne merdiger uıymdardyń 107 birlik arnaıy tehnıkasy jumyldyrylady. Qazirgi ýaqytta PMHZ 2025 jylǵy josparly aldyn alý jumystaryn júrgizý úshin kestege sáıkes daıyndyq is-sharalaryn atqaryp jatyr. PMHZ josparly aldyn alý jumystary kezinde ishki naryqta janar-jaǵarmaı materıaldarynyń turaqtylyǵyn saqtaý jáne munaı ónimderin jóneltýdi qamtamasyz etý úshin taýar ónimderiniń mynadaı qoryn jınaqtaýdy josparlap otyr: benzın – 50 000 tonna, dızel otyny – 25 000 tonna, avıakerosın – 7 000 tonna. Bul munaı ónimderin Energetıka mınıstrliginiń jetkizý kestesine saı ishki naryqqa jóneltip otyratyn bolady, - delingen QazMunaıGaz kompanııasy habarlamasynda.
Atalǵan kezeńde júrgiziletin eń iri jumystardyń qatarynda — munaıdy bastapqy óńdeý óndirisindegi gaz kompressorlyq TsK-201 ortadan tepkish kompressordyń týrbınasyn kúrdeli jóndeý jáne kerosındi gıdrotazartý qondyrǵysyndaǵy katalızatordy aýystyrý.
PMHZ-da josparly aldyn alý jumystaryn júrgizý kezinde QazMunaıGazǵa qarasty basqa eki qazaqstandyq zaýyt — Atyraý jáne Shymkent munaı óńdeý zaýyttary — munaı ónimderin shtattyq rejımde shyǵarýdy jalǵastyrady.
Aıta keteıik, Úkimette Almaty oblysynda tuzdy taǵamdar óndiretin zaýyt salý máselesi talqylandy.