Túrkistan oblysynda ana ólimi eki esege ósken

TÚRKІSTAN. KAZINFORM – Óńirde qaterli isikten 600-den astam adam qaıtys bolǵan.

Túrkistan oblysynda 2023 jyly eki ana ólimi tirkelse, 2024 jyly bul kórsetkish 4-ke kóbeıgen. Al, náresteler óliminiń deńgeıi 404-ten 364-ke tómendep otyr.

Jalpy óńirde qaterli isikterden bolatyn ólim kórsetkishi 742-den 669-ǵa, qan aınalym aýrýlarynan bolatyn ólim-jitim 2042-den 1958-ge, týberkýlezden bolatyn ólim-jitim 8-den 5-ke azaıǵan.

Óńir turǵyndaryn dári-dármekpen qamtý boıynsha ótken jyly 15,9 mlrd teńgege dárilik zattar men medıtsınalyq buıymdardyń 549 túrin satyp alýǵa ótinim berilgen. Al, oblystaǵy medıtsınalyq mekemelerdiń tehnıkamen jaraqtandyrylýy 85,22 paıyzdy qurady.

- Oblystaǵy 3 perınataldyq ortalyqtyń árqaısysynda «Uryqty qorǵaý ortalyqtary» jumysy jolǵa qoıylǵan. Ortalyqtarda «Bir kúndik klınıka» jobalary iske qosyldy. Munda júkti áıelder bir kúnde perınataldyq dıagnostıkanyń barlyq túrlerinen ótip, zertteýlerdiń jyldam ári naqty nátıjelerin ala alady. Ótken jyly 23 861 keńes berilse, onyń 23 153-in júkti áıelder qurap otyr. Al, 341-i týa bitken aqaýy bar balalar bolsa, 367-si qaýip-qater tobyndaǵy áıelder, - dedi Túrkistan oblystyq densaýlyq saqtaý basqarmasy basshynyń orynbasary Baýyrjan Satybaldy.

Aıta keteıik, budan buryn Túrkistan oblysynda onkologııalyq aýrýǵa shaldyǵýshylar kóbeıgenin jazǵan bolatynbyz.