Pavlodar munaı-hımııa zaýytynda óndiris azaıdy ma
PAVLODAR. KAZINFORM — Pavlodar munaı-hımııa zaýyty jyl basynan beri 3 mln tonnaǵa jýyq daıyn munaı ónimderin tıegen. Ónerkásip josparly kórsetkishten aýytqymaǵan.
Bıyl jazda pavlodarlyq munaı óńdeý zaýyty josparly jóndeýge uzaq ýaqyt turýyp qalýy sebepti kúzde avtokólik benzıni men dızel otynynyń óndirisi azaıýy múmkin degen áńgime taraǵan.
Bul jaǵdaı onsyz da baǵasy kúnnen kúnge qymbattap kele jatqan benzınniń kólemin azaıtyp, otandyq naryqta dúrbeleń týdyryp jibere me degen kúdik boldy. Kazinform tilshisi máseleni anyqtap kórdi.
«PMHZ» JShS bas dırektorynyń mindetin atqarýshy Sergeı Petrýktyń aıtýynsha, jyldyń alǵashqy 8 aıynda kásiporyn 1044,4 myń tonna avtobenzın, 1281,2 myń tonna dızel otynyn. 136,8 myń tonna avıaotyn, 255,5 myń tonna munaı bıtýmyn, 249,6 myń tonna kóleminde jaǵatyn mazýt óndirgen.
— Energetıka mınıstrligi 2025 jylǵa bekitken óndiristik josparǵa sáıkes, «PMHZ» JShS 5,5 mln tonna munaıdy óńdep, 1581,9 myń tonna avtobenzındi, 1844,5 myń tonna dızel otynyn, 200,0 myń tonna avıaotyndy, 366,0 myń tonna munaı bıtýmyn, 455,7 myń tonna jaǵatyn mazýtty shyǵarýy tıis. Bizde suıyltylǵan gaz da shyǵarylady, jyl basynan 182,4 myń tonnasy óndirildi. Óndiristik tehnologııalarymyzda kidiris joq, — deıdi zaýyt basshysy.
Resmı derekterge súıensek, 2023 jyly kásiporyn naryqqa 4 mln 799 myń tonna daıyn munaı ónimderin jóneltti.
Munaı ónimderiniń 95 paıyzy Qazaqstanda qalsa, ózgesi Reseı, Tájikstan, Ózbekstan, Qytaı elderine eksporttalǵan.
Zaýyt syrtqy elderge negizinen munaı koksy men tehnıkalyq kúkirt jáne jaǵylatyn mazýtty eksporttaıdy.
Al byltyr kásiporyn tuńǵysh ret rekordyq kólemdegi 5,5 mln tonna munaıdy óńdep, zaýyttan 1 mln 607 myń tonna avtobenzın, 1 mln 849 myń tonna dızel otynyn, 236 myń tonna áýe kóligi otynyn, 321 myń tonna suıyltylǵan gaz shyǵarǵan.
Ushaq otyny boıynsha óndiris 16, 5% — ǵa, benzın 3,5%, suıyltylǵan gaz óndirisi 3,5%-ǵa kóbeıe túsken.
Eske sala keteıik, Qazaqstan alǵash ret jylyna 100 mln tonna munaı óndirý deńgeıine shyqpaq.