Pavlodar men Novosibir dárigerleri pandemııaǵa qarsy birlese áreket etpek
PAVLODAR. QazAqparat - Qazaqstandyq jáne reseılik mamandar yntymaqtastyq pen turaqty tájirıbe almasý týraly onlaın-konferentsııa barysynda pandemııaǵa qarsy kúreste ózara birlesip áreket etýge kelisti, dep habarlaıdy QazAqparat ravlodarnews.kz-ke silteme jasap.
Oblystyq densaýlyq saqtaý basqarmasynyń málimdeýinshe, onlaın-konferentsııaǵa Novosibir oblysy Densaýlyq saqtaý mınıstriniń orynbasary Elena Aksenova jáne Pavlodar oblysy densaýlyq saqtaý basqarmasynyń basshysy Birjan Dosmaıylov, sondaı-aq eki óńirdiń ınfektsıonısteri, pýlmonologtary, reanımatologtary men sanıtarlyq dárigerleri qatysty.
Onlaın-konferentsııa barysynda Novosibir dárigerleri koronavırýs pandemııasymen qalaı kúresip jatqandary týraly aıtty. Olardyń emdeý hattamalary qazaqstandyq mamandardyń emdeý hattamalaryna uqsas. Novosibir oblysynda da josparly medıtsınalyq kómek kórsetý shektelgen, patsıentter legi bólingen, úıge shyǵý úshin brıgadalar qurylǵan jáne kómekti barynsha úıde kórsetýge tyrysady.
- Bizdiń reseılik áriptesterimiz óz problemalaryn jáne olardy sheshý joldaryn ortaǵa saldy, - deıdi onlaın-kezdesýge qatysqan Pavlodar oblysynyń shtattan tys bas reanımatology Inna Glovatskaıa. - Olar tósek-oryndardy ottegi núktelerimen qamtamasyz etý týraly aıtty. Novosibir oblysynda da ortalyqtandyrylǵan ottegi núkteleri joq jerlerde ottegi kontsentratorlary qoldanylady.
Pavlodarlyq dárigerler de koronavırýs ınfektsııasymen, pnevmonııamen jáne JRVI-men aýyratyndardy emdeýdegi óz tájirıbelerimen bólisti. Eki oblystyń birinshi basshylarynyń kelisimimen uıymdastyrylǵan konferentsııanyń qorytyndysy boıynsha taraptar pandemııaǵa qarsy kúreste ózara is-qımyl jasasý jáne shekara mańyndaǵy óńirlerdiń dárigerlerimen turaqty tájirıbe almasyp turý jóninde kelisti.
Búgingi tańda Pavlodar oblysynyń emhanalarynda 93 mobıldik brıgada jumys isteıdi. Olar shaqyrýlarǵa jedel shyǵý jáne úıde sapaly medıtsınalyq qyzmet kórsetý úshin barlyq qajetti qural-jabdyqpen qamtamasyz etilgen. Óńir boıynsha ottegi núkteleriniń sany ósýde, aıdyń sońyna deıin onyń sanyn 600-ge jetkizý josparlanýda. Sondaı-aq ottegi kontsentratorlarynyń sany belsendi túrde arttyrylýda.
