Pavlodar men Qaraǵandyda kómirden dızel óndiretin jobalar iske asyrylady

ASTANA. KAZINFORM — Pavlodar men Qaraǵandy oblystarynda kómirden dızel otynyn óndiretin jobalar iske asyrylady. Bul týraly Úkimet otyrysynda Energetıka mınıstri Erlan Aqkenjenov aıtty.

— Kómir ónerkásibin damytýdyń negizgi baǵyttarynyń biri kómir hımııasyn damytý ekenin jeke atap ótkim keledi. Búgingi tańda kómir hımııasy salasynda 3 joba iske asyrylýda. Birinshisi — Qaraǵandy oblysynda qýaty 132 mlrd dollar bolatyn, 1 mln tonna metallýrgııalyq koks óndiretin zaýyt salý. Jumys oryndary — 500 adamǵa deıin, — dedi mınıstr.

Onyń aıtýynsha, Pavlodar jáne Qaraǵandy oblystarynda quny 63 mln jáne 65 mln dollar bolatyn ári 1 160 jáne 1 250 jumys oryndaryn qurýǵa múmkindik beretin 2 joba iske asyrylady. Atalǵan jobalardyń árqaısysy kómirden 100 myń tonnaǵa deıin dızel otynyn óndirýge múmkindik beredi. Munan bólek taǵy 3 joba pysyqtalyp jatyr. Atap aıtqanda, Qaraǵandy oblysynda koks hımııasy óndirisi, Abaı oblysynda jylyna 300 myń tonnaǵa deıin ammıak jáne 300 myń tonna karbamıd óndirisi iske qosylýy múmkin. Sonymen qatar kómirden jylyna 2 mlrd tekshe metr gaz óndiretin joba bar. Bul nysannyń ornalasatyn jeri áli aıqyndalmaǵan.

— Kómir ónerkásibi energetıkalyq qaýipsizdik pen eksporttyq áleýetti qamtamasyz ete otyryp, el ekonomıkasy úshin strategııalyq mańyzdy saqtaýda. Eldiń baı kómir áleýeti kómir hımııasy salasynda jańa óndirister qurýǵa múmkindik beredi. Sonymen qatar kómir hımııasyn damytý jobalardyń joǵary kapıtal syıymdylyǵy men tehnologııalyq kúrdeliligi, zamanaýı tehnologııalardy engizýdiń shekteýli tájirıbesi, kadrlyq áleýetti damytý qajettiligi, normatıvtik bazany qalyptastyrý satysynda sııaqty birqatar faktorlarmen qatar júredi, — dedi ol.

Aıta keteıik, bıyl kómir salasyna 553 mln teńge ınvestıtsııa tartylady.