Pavlodar mektepterinde 6 myńnan astam oryn tapshylyǵy bar

PAVLODAR. KAZINFORM - Mektepterdegi oryn tapshylyǵy máselesi «Jaıly mektep» ulttyq jobasy aıasynda sheshilmek. Jańa oqý jylynda 7 mekteptegi oqýshylar úsh aýysymda oqıtyn bolady.

Oblys ortalyǵyndaǵy «Dostyq» shaǵyn aýdanynyń oqýshylary bıylǵy qarasha aıynan bastap jańa mektepte oqıtyn bolady. Aýmaqta «Jaıly mektep» ulttyq jobasy aıasynda 1200 balaǵa arnalǵan zamanǵa saı bilim uıasy paıdalanýǵa beriledi. Búginde qurylys jumystary aıaqtalý sheginde.

Óńirlik bilim berý basqarmasynyń málimetinshe, jańa ǵımarat qalanyń atalǵan bóligindegi oryn tapshylyǵyn sheshedi. Al mekteptiń ózi zamanǵa saı oqý jabdyqtarymen qamtylady.

«Pavlodar oblysynda barlyǵy 5 jaıly mektep salynady degen jospar bar. Bul mektepterdegi oryn tapshylyǵyn sheshedi degen úmit zor. Qazirgi ýaqytta oblysta shamamen 6 myń oryn tapshylyǵy bar. 7 mekteptegi oqýshylar úsh aýysymda oqyp jatyr», - dep málimdedi basqarmadan.

Buǵan deıin Pavlodar oblysynda qazaq synybynan jerigen ata-analar kóp ekeni týraly jazǵan edik.