Pavlodar mektepteriniń 25 paıyzy jaratylystaný pánderin aǵylshyn tilinde ótkizedi
ASTANA. QazAqparat - Pavlodardyń №7 jalpy orta bilim berý mektebinde úsh tildi oqytý boıynsha «Úzdik sabaq ázirleý» jónindegi І qalalyq baıqaýy ótti, dep habarlaıdy pavlodarnews.kz.
Konkýrstyń maqsaty - pedagogtardy jaratylystaný pánderin aǵylshyn tilinde oqytý tájirıbesin jetildirýge yntalandyrý. Qalalyq bilim berý bóliminiń kóptildilik jónindegi ádiskeri Nazıra Sábıtovanyń aıtýynsha, baıqaýǵa qalamyzdaǵy barlyǵy derlik mektepterdiń muǵalimderi qatysty.
«Bul baıqaý qalamyzda alǵash ret ótkizilip otyr. Konkýrsqa jalpy sany 83 jumys kelip tústi. Fızıka, hımııa, bıologııa jáne ınformatıka pánderin aǵylshynsha oqytý boıynsha ázirlengen sabaqtardy oblys ortalyǵyndaǵy mektepter dırektorlarynyń orynbasarlarynan qurylǵan arnaıy komıssııa baǵalaıdy», - deıdi Nazıra Sábıtova.
Kelip túsken jumystardyń 26-sy bıologııa páni boıynsha, 19-y - ınformatıka boıynsha. Komıssııa quramyndalar jumystardyń pándik mazmuny men onyń aǵylshyn tilindegi durystyǵyn baǵalaıtyn mamandar bar. Qalalyq bilim berý bólimi ókilderiniń aıtýlarynsha, úzdik úsh orynǵa ıe bolǵandar dıplomdarmen marapattalady. Oǵan qosa, konkýrsanttar «Úzdik SMART-sabaq», «Úzdik CLIL-sabaq», «Úzdik ІT-sabaq», «Tildik emes pánder ishinde aǵylshyn tilindegi úzdik joba», «Jas urpaq», «Sabaqtyń úzdik mazmuny» sekildi nomınatsııalar boıynsha óz baǵasyn alady.
Sonymen qatar, tańdalyp alynǵan úzdik jumystar kóptilde oqytýdyń arnaıy derekter bazasyna engiziledi. Bul jınaq barlyq mektepterge taratylady.
«Qazirgi kezde qalamyzdaǵy mektepterde jaratylystaný pánderiniń shamamen 25 paıyzy pılottyq rejımde aǵylshyn tilinde oqytylady. Josparǵa sáıkes 2019-2020 oqý jylynda keıbir mektepterdegi 10-11 synyptar bul pánderdi tolyǵymen aǵylshynsha oqı bastaıdy. Osy maqsatqa búginde qalamyzda 146 muǵalim oqytýdan ótip, aǵylshyn tilin meńgerý boıynsha V1, V2, S1 dárejesine ıe», - deıdi N.Sábıtova.
