Pavlodar mektepteri jańa formattaǵy oqýlyqtarmen qamtylady
PAVLODAR. QazAqparat - Pavlodar bilim bólimi mektepter úshin tek qazaq, orys tilderinde ǵana emes, aǵylshyn tilindegi kitaptardy da satyp aldy, dep habarlaıdy QazAqparat tilshisi.
«Úshinshi, altynshy jáne segizinshi synyptarǵa arnalǵan jańa formattaǵy oqýlyqtar men ádistemelik quraldardyń elektrondyq nusqalaryn da alýǵa bolady. Olar 2018-2019 oqý jylynyń basynda qoljetimdi bolady. Kitaptardyń elektrondy kóshirmesin alý úshin planshetke nemese telefonǵa arnaıy QR-kodtardy skanerleý qajet. Oqýlyqtar oqý baǵdarlamalaryna tolyq sáıkes keledi», - deıdi Pavlodar bilim bóliminiń ókilderi.
Bilim bólimi bergen málimetterge qaraǵanda, oqýlyqtar balalardyń jas erekshelikterin eskere otyryp qurastyrylǵan. Budan tys, mektepke deıingi bilim mekemeleri, shaǵyn ortalyqtarǵa arnalǵan oqý-ádistemelik keshender de alyndy.
«Úsh tuǵyrly til jobasy júzege asyrylyp jatyr. Balalar bıologııa, fızıka, hımııa, ınformatıka pánderin aǵylshyn tilinde oqıtyn synyptarǵa jaǵdaı jasalyp jatyr», - deıdi sheneýnikter.
Aǵylshyn tilindegi 4 440 ekzemplıar oqýlyq satyp alyndy. Oqýlyqtardy satyp alý úshin bilim bólimi on eki baspamen kelisimshart jasasty. Barlyǵy 428 047 ekzemplıar satyp alyndy. Qazirge deıin «Bóbek», «NIM», «Almatykitap», «Atamura», «Astana kitap», «Arman-PV» baspalarynyń kitaptary jetkizilgen.
«Mektep oqýshylaryna kitaptar men jumys dápterleri tegin beriledi», - deıdi bilim bóliminiń ókilderi.
