Pavlodar: Mektep ashanasynda 23 balanyń ýlanýyna baılanysty is qozǵaldy
PAVLODAR. QazAqparat - Oblystyq taýarlar men qyzmetterdiń sapasyn baqylaý departamenti tekserý barysynda mektep ashanasynda sanıtarlyq erejelerdiń buzylǵanyn anyqtady, dep habarlaıdy QazAqparat pavlodarnews.kz silteme jasap.
Tekseristiń alǵashqy nátıjesin departament basshysy Irına Sorokına aıtty. Ol ýlanǵan balalardyń sany 23-ke deıin artqanyn jáne olar - 1-7 synyp oqýshylary ekenin atap ótti.
«16 qazandaǵy jaǵdaı boıynsha statsıonarda bir bala qaldy. Qalǵan 22 balanyń jaǵdaıy qanaǵattanarlyq, - dedi Irına Sorokına. - Epıdemıologııalyq tekserý barysynda mekteptiń as blogynda ereje buzýshylyqtar tirkeldi. Sondaı-aq zerthanalyq baqylaý kezinde talapqa saı kelmeıtin synamalar anyqtaldy. Epıdemııaǵa qarsy is-sharalar jalǵasýda. Sonymen qatar, polıtsııa basqarmasy tarapynan qylmystyq is qozǵaldy».
Departament basshysy balalardyń ýlanýynyń naqty sebebi bálishten nemese las ydystardan bolǵany 20 qazan kúni, ıaǵnı taldaý nátıjeleri jarııalanǵan kezde belgili bolatynyn aıtty.
Pavlodar oblysy polıtsııa departamentiniń resmı ókili Janar Belıalovanyń málimdeýinshe, QR QK 304 baby – «erejelerdi nemese gıgıenalyq normatıvterdi buzý» boıynsha qozǵalǵan qylmystyq is negizinde tergeý júrýde.
Eske salaıyq, Pavlodar aýylynyń №40 JOM alǵashqy jeti oqýshysy 10 qazanda medıtsınalyq kómekke júgingen bolatyn. Túnde balalardyń qyzýy kóterilip, qusý jáne dıareıa bastalǵan.
Oqys oqıǵadan keıin birneshe kún ishinde zardap shekkender sany 22-ge, sodan keıin 23-ke deıin ósti.
