Pavlodar mektebine 45 mln teńgege fýtbol alańy salyndy
PAVLODAR. QazAqparat - Pavlodar qalasynda Baýyrjan Momyshuly atyndaǵy №22 mektepte úlken fýtbol alańy paıda boldy. Sport alańynyń tusaýkeserine aımaq basshysy Bolat Baqaýov qatysty, dep habarlaıdy QazAqparat.
Oblys ákimi oqýshylar men ustazdardy mektep ómirindegi mańyzdy is-sharamen quttyqtap, sport alańynyń bos turmaıtynyna senim bildirdi.
«Balalardyń sportqa degen qyzyǵýshylyqtaryn arttyrý maqsatynda Pavlodar oblysynda barlyq jaǵdaılar jasalǵan. Búgin biz talaptarǵa saı keletin úlken fýtbol alańyn ashyp jatyrmyz. Menińshe, bul balalarymyzdyń daǵdylaryn damytyp, sportta jetistikterge jetýge kómektesedi», - dedi ol.
Dopty sımvolıkalyq túrde oıynǵa engizýdiń ornyna aımaq basshysy «Ertis» fýtbol klýbynyń golkıperi Serikbol Qapanovtyń qaqpasyna penaltı túsirdi. Sodan keıin jańa alańda mektep komandalarynyń arasynda joldastyq oıyn ótti.
Pavlodar oblysy ákimdiginen málim etkendeı, alańnyń jalpy quny 45 mıllıon teńgeni quraıdy. Sondaı-aq jasandy gazon men trıbýna, strıtbol jáne voleıbol oıyndaryna arnalǵan rezeńkemen jabylǵan alańdar, gımnastıkalyq keshen, júgirýge arnalǵan joldar, alysqa sekirýge arnalǵan shuńqyr jasaqtalǵan. Sonymen qatar alań aımaǵy qorshalyp, jaryqtandyrylǵan.
