Pavlodar mekemelerine qashyqtan jumys isteýge kóshý usynyldy
PAVLODAR. QazAqparat – Qazaqstanda jarııalanǵan tótenshe jaǵdaıǵa baılanysty Pavlodar oblystyq eńbek basqarmasy barlyq mekemelerdi onlaın jumys rejımine kóshýge keńes berdi, dep habarlaıdy QazAqparat tilshisi.
«Qazaqstannyń eńbek zańnamasy eńbek qyzmetiniń túrli tetikterin - tolyq emes jumys ýaqyty rejımin engizý, qashyqtan jumys jasaýdy ornatý, basqa jumysqa ýaqytsha aýystyrý jáne taǵy basqalaryn qarastyrady. Mundaı múmkindikter bolmaǵan jaǵdaıda jumys berýshi qyzmetkerlerdi ýaqytsha jumyssyz qaldyrýǵa quqyǵy bar», - dep habarlady jýrnalısterge Pavlodar oblystyq eńbek basqarmasynan.
Eńbek sharty boıynsha, eger jumysty ýaqytsha toqtata turýdyń sebebi kásiporyn men qyzmetkerge baılanysty bolmasa, ol eńbek jáne ujymdyq shart boıynsha rásimdeledi.
Jumysty ýaqytsha toqtatý tólemi eń tómengi jalaqydan – 42500 teńgeden az bolmaýy tıis, dep atap ótti aımaqtyq basqarmadan.
«Eger uıym óz qyzmetin toqtatyp, qyzmetkerlerin tótenshe jaǵdaı kezinde jalaqysy saqtalmaǵan eńbek demalysyna jiberse, eńbek basqarmasynyń ókilderi +77056092989 nómirine habarlasýdy suraıdy. Habarlamany WhatsApp messendjeri arqyly jáne jasyryn túrde qaldyrýǵa bolady. Bul shara, eń aldymen, qolda bar faktilerge taldaý júrgizýge jáne tótenshe jaǵdaı kezinde jumys berýshige kásiporyn qyzmetiniń qazirgi tetikteri týraly habardar etýge baǵyttalǵan», - dedi vedomstvodan.
Eske salaıyq, Qazaqstan Prezıdenti Qasym-Jomart Toqaev koronavırýs ınfektsııasynyń taralýyna baılanysty elimizde 16 naýryzdan bastap TJ rejımin engizdi. Ol 2020 jyldyń 15 sáýirine deıin jalǵasady.
Avtory: Anton Gagarın
