Pavlodar: Qutqarýshylar Aqsýda jolda qalǵan sheteldikterge kómektesti
PAVLODAR. QazAqparat – Aqsýda qutqarýshylar Reseıdiń Chıta qalasynan Ózbekstannyń Qashqadarııa oblysynan shyǵyp, orta jolda kólikteri buzylǵan tórt jolaýshyǵa kómektesti, dep habarlaıdy «QazAqparat» HAA tilshisi.
«19 jeltoqsan kúni saǵat 17:58-de respýblıkalyq dárejedegi Qyzylorda-Pavlodar tas jolynyń 1383-shi shaqyrymynda Aqsý mańynda tehnıkalyq aqaý saldarynan Reseı Federatsııasynyń Chıta qalasy – Ózbekstan Respýblıkasynyń Qashqadararııa oblysy baǵytymen kele jatqan «Chevrolet Lacetti» markaly jeńil avtokóligi júrmeı qalǵan. Kólikte tórt jolaýshy bolǵan. Olardyń barlyǵy – Ózbekstan azamattary», - dep habarlady Pavlodar oblysynyń TJ departamentiniń baspasóz qyzmeti jýrnalısterge.
Qutqarýshylar jolaýshylardy Qalqaman aýylynyń mektep ǵımaratynda ornalasqan jylytý pýnktine apardy. TJD olardyń ystyq shaı iship, demalǵandaryn atap ótti.
«Qalqaman aýylynyń joldaǵy medıtsınalyq-qutqarý pýnktiniń dárigeri jolaýshylardy tekserip, keıbireýiniń ótinishi boıynsha qysymyn ólshedi. Jalpy, jolaýshylar men júrgizýshilerdiń eshqaısysyna medıtsınalyq kómek qajet emes», - dep naqtylady aımaqtyq departamentte.
Oqıǵa ornyna Aqsý qalasynyń TJ bóliminiń qyzmetkerleri keldi.
